Президентимиз ташаббуси билан мамлакатимизда хотин-қизлар бандлигини таъминлаш, уларнинг доимий даромад манбаини шакллантириш, яшаш шароитларини яхшилашга қаратилган кенг кўламли ишлар олиб борилмоқда. Бу борада Андижонда ҳам вилоят ҳокимлиги, Оила ва хотин-қизлар, Бандлик бошқармалари ҳамда бошқа мутасадди ташкилотлар ҳамкорлигида тизимли ишлар амалга оширилмоқда.

Айни кунда Андижон вилоятида 1 миллион 675 минг нафардан зиёд хотин-қиз истиқомат қилади. Шундан 930 минг нафардан ортиғини 30 ёшгача бўлган хотин-қизлар ташкил этади. Вилоятда ишсиз хотин-қизлар бандлигини таъминлаш масаласи долзарб муаммолардан бири ҳисобланади.  

– Ўтган йилнинг декабрь ойида тасдиқланган Бандлик дастурига кўра, жорий йилда 42 минг 335 нафар ишсиз хотин-қизнинг бандлигини таъминлаш белгилаб олинган, – дейди Андижон вилояти ҳокимининг ўринбосари, Оила ва хотин-қизлар бошқармаси бошлиғи Гулнорахон Аҳмедова. – Жумладан, дастур доирасида хотин-қизларнинг 7 минг 559 нафарини касб-ҳунарга, 7 минг нафарини тадбиркорликка ўқитиш, 12 минг 670 нафарини доимий ишларга жойлаштириш, 10 минг 570 нафарини ҳақ тўланадиган жамоат ишларига жалб этиш, 4 минг 536 нафарини субсидиялар бериш орқали бандлигини таъминлаш кўзда тутилган. Жорий йилда ана шу йўналишдаги ишлар режа асосида олиб борилмоқда.  

Амалга оширилган ишлар натижасида вилоятда жорий йилнинг ўтган уч ойи давомида 13 минг 527 нафар хотин-қизнинг бандлиги таъминланди. Жумладан, 2 минг 915 нафар опа-синглимиз доимий ишларга жойлаштирилди. Шунингдек, 1 минг 436 нафар хотин-қиз якка тартибдаги тадбиркор сифатида рўйхатдан ўтиш, 4 минг 254 нафари ўзини-ўзи банд қилиш, 1 минг 184 нафари ҳақ тўланадиган жамоат ишларига жалб этилиш, 18 нафарининг ишсизлик нафақаси тайинлаш орқали бандлиги таъминланди. Бундан ташқари, 1 минг 206 нафар хотин-қиз меҳнат бозорида талаб юқори бўлган касб-ҳунарларга ўқитилган бўлса, 48 нафар аёлнинг бандлиги деҳқон хўжаликлари ташкил этиш орқали таъминланди.  

Ана шу йўналишдаги ишларни ташкил этиш учун 2 минг 466 нафар хотин-қизга 28,6 миллиард сўм миқдорида имтиёзли кредитлар ажратилди.  

Вилоятда опа-сингилларимизнинг бандлигини таъминлашга қаратилган ишлар тизимли равишда давом эттирилмоқда. Хусусан, Оила ва хотин-қизлар бошқармаси ташаббуси билан шу йил 16 март – 5 апрель кунлари вилоятда хатлов ўтказилди. Хатлов жараёнида вилоятдаги камбағал ва даромади паст оилалар рўйхатига киритилган 4 минг 344 та оилада истиқомат қилувчи 9 минг 97 нафар хотин-қиз билан бевосида суҳбат ва мулоқотлар ўтказилди, уларнинг имконият ҳамда қизиқишлари ўрганилди.  

Хатлов жараёнидаги ўрганишлар натижасида 1 минг 941 нафар аёл ўз хонадонида иссиқхона ташкил этиш, 1 минг 613 нафари паррандачилик, 1 минг 60 нафари чорвачилик, 509 нафари асаларичилик, 1 минг 1 нафари қуёнчилик, 1 минг 950 нафари ҳунармандчилик билан шуғулланиш, 1 минг 23 нафари бошқа турли йўналишларда ўз тадбиркорлигини йўлга қўйиш орқали даромад топиш имкониятлари борлигини билдирди.  

[gallery-16946]

Ўрганиш натижаларидан келиб чиқиб, ҳар бир маҳаллада опа-сингилларимизнинг қизиқиш ва имкониятлари асосида “Ҳар бир оила тадбиркор”, “Кичик бизнесни узлуксиз қўллаб-қувватлаш” дастурлари доирасида кредитлар ажратиш, шунингдек, субсидиялар тақдим этиш ва бошқа манбалар орқали уларнинг бандлигини таъминлаш, доимий даромад манбаини шакллантириш бўйича зарур ишлар олиб борилмоқда.  

Бир сўз билан айтганда, вилоятда хотин-қизлар бандлигини таъмилаш бўйича белгиланган чора-тадбирлар режа асосида изчил давом эттирилмоқда.  

Ф. Убайдуллаев,

З. Умрзоқов (сурат), ЎзА мухбирлари