Йиғилишда депутатлар бир қатор қонун лойиҳаларини кўриб чиқди. Шу жумладан, Андижон вилояти Бўз туманининг номини ўзгартириш тўғрисидаги қарор лойиҳаси муҳокама этилди.

Мазкур лойиҳа Ўзбекистон Республикаси Президенти Шавкат Мирзиёевнинг 2019 йил 16-17 май кунлари Андижон вилоятига ташрифи давомида берилган топшириқлар асосида ишлаб чиқилди.

Бўз тумани ҳудуди 20 минг 47 гектардан иборат бўлиб, шундан жами экин майдони 12 минг 361 гектарни ташкил этади. Қолган 7 минг 686 гектари аҳоли хонадонлари, йўл ва бошқа объектлардан иборат. Бўз тумани вилоятнинг Улуғнор, Балиқчи, Шаҳрихон туманлари, қўшни Фарғона вилоятининг эса Қува ва Ёзёвон туманлари билан чегарадош ҳисобланади.

Бўз тумани ташкил этилганига 70 йил бўлган бўлса, дастлаб бу ерларда аҳоли истиқомат қилмаган, қамишзор ва бўз ерлардан иборат бўлган. Кейинчалик бу ерларга одамлар кўчиб келиши ва ерларнинг ўзлаштирилиши натижасида туман гуллаб-яшнади. Чўл номидан асар ҳам қолмаган.

Юқорида келтирилган тумандаги бўз ерларнинг ўзлаштирилиши натижасида ҳудуднинг ободонлаштирилиши, халқ турмуш шароитининг яхшилангани ҳамда замонавий ижтимоий, саноат, дам олиш ва кўнгилочар масканларнинг шакллангани муносабати билан туман номини ҳозирги қиёфаси билан мослигини таъминлаш мақсадида ушбу таклиф киритилган.

Қарор лойиҳасига кўра, Бўз тумани номини Бўстон туманига ўзгартириш назарда тутилмоқда.