Мамлакатимиз спорт жамоалари 2026 йилни юксак натижалар билан қарши олишга ҳозирланмоқда.

Хусусан, матонат, ирода ва жасорат тимсоли бўлган ампутант футболчиларимиз янги йилни ўзига хос натижалар билан қаршилаётгани эътиборли.

Биргина жорий йил ноябрь ойида Индонезияда ампутантлар футболи бўйича 2026 йилги жаҳон чемпионати Осиё саралаш босқичида Ўзбекистон терма жамоаси муваффақиятли қатнашди.

Қитъанинг 9 та терма жамоаси иштирок этган саралаш мусобақасининг “Б” гуруҳида Малайзия, Яман, Бангладеш терма жамоаларини мағлуб этган ҳамюртларимиз 9 очко жамғариб, келгуси йилнинг 31 июль - 6 август кунлари Коста-Рикада ўтиши режалаштирилган жаҳон чемпионати йўлланмасига эга чиқди.

Албатта, ютуқларга ўз-ўзидан эришилмайди. Бу муваффақиятлар ортида мамлакатимизда оддий инсонлар қатори, имконияти чекланганларни оммавий спорт билан шуғулланиши, ўз иқтидорини намойиш этиши учун зарур шарт-шароитлар яратилгани ётади.

Давлатимиз раҳбари томонидан ўтган йил имзоланган “Ногиронлиги бўлган шахсларни спортга жалб этиш орқали жисмоний реабилитация қилиш тизимини такомиллаштириш бўйича қўшимча чора-тадбирлар тўғрисида”ги қарорида Сурдлимпия, Махсус олимпия, IBSA жаҳон ўйинлари дастурига киритилган спорт турлари ҳамда ампутантлар футболи бўйича жаҳон чемпионати ғолиб ва совриндор спортчилари, уларни тайёрлаган тренерларни қўллаб-қувватлаш назарда тутилган. Бугунги кунга келиб Ўзбекистон миллий паралимпия қўмитаси томонидан имконсизликдан имкон топишга интилаётганларнинг профессионал спорт билан шуғулланишини рағбатлантириш борасида кенг кўламли ишлар амалга оширилмоқда.

Биргина ампутант футболчилар ўртасида ўқув-машғулотлар, мусобақалар ташкил этиб келинаётгани, миллий терма жамоани шакллантириш, халқаро мусобақаларда юқори натижаларни қўлга киритиши борасида зарур ишлар қилиндики, бу, эришилаётган кўрсаткичларда ўз аксини топмоқда.

Ўзбекистон ампутантлар футбол терма жамоаси сардори Абдужамил Шукуров ва маҳоратли футболчиси Умиджон Сирожиддинов билан ўтказган суҳбатимизда келгуси йили Коста-Рикада бўладиган жаҳон чемпионатига тайёргарлик жараёнлари, ампутантлар футболига давлатимиз томонидан берилаётган эътибор, йил давомидаги мусобақа ва ўқув-машғулот йиғинлари борасида фикр-мулоҳазалар билдирилди.

<iframe width="640" height="420" src="https://www.youtube.com/embed/srr780Tg7Yw" title="Amputantlar futboli: Muvaffaqiyatga e’tibor, mehnat va hamjihatlik orqali erishiladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Т.Рўзиев,

А.Аҳмедов, Н.Абдувоитов (видео), ЎзА