16 қаңтарда американдық астронавттар Ник Хейг және Сунита Уильямс Халықаралық ғарыш станциясының (ХҚС) бортынан ашық ғарышқа шықты.

Астронавттар астрофизикалық құралға қызмет көрсету және жаңа байланыс блогын орнату үшін ашық ғарышқа шыққан. Ғарыш вакуумына шығу АҚШ Шығыс жағалауы уақытымен сағат 08:05-те басталып, техникалық жұмыстар 6,5 сағатқа жуық уақытқа созылды.

2024 жылдың маусым айында американдық екі астронавттың ХҚС бортынан ашық ғарышқа шығуы сәтсіз аяқталған еді.

ХҚС бортында американдық астронавттар Трейси Дайсон мен Мэттю Доминик 13 маусымда ғарыш вакуумына шығуы тиіс болған, бірақ скафандрмен байланысты мәселелердің салдарынан бұл процесс тоқтатылған еді. 24 маусымда астронавттар ашық ғарышқа 31 минутқа шығып, Дайсонның скафандрындағы салқындату контурынан су ағып кетуіне байланысты станцияға қайта оралуға мәжбүр болған.

Қазіргі уақытта ХҚС-да жеті адамнан тұратын экипаж — «Роскосмос» ғарышкерлері Алексей Овчинин, Иван Вагнер және Александр Горбунов, NASA астронавттары Ник Хейг, Дональд Петтит, Бутч Уилмор және Сунита Уильямс жұмыс істеп жатыр.

23 қаңтарда америкалық астронавттар биылғы жылы екінші рет ашық ғарышқа шығуды жоспарлап отыр.