Аввал хабар берганимиздек пойтахтимизда муҳим тадбир – Ўзбекистон – АҚШ соғлиқни сақлаш ҳафталиги бўлиб ўтмоқда.

Маълумки, АҚШ соғлиқни сақлаш тизими жаҳон тиббиёти авангард ҳисобланади. Хирургия хусусан, кардиожарроҳлик йўналиши америкалик мутахассислар дунёга намуна бўла олади. Шубҳасиз ўзбек шифокорлари Қўшма Штатлари тажрибаларини ўзлаштириб, уларни амалиётга татбиқ этиши соҳа ривожига катта таъсир кўрсатади. Мамлакатимизда бўлиб ўтаётган Ўзбекистон – Америка соғлиқни сақлаш ҳафталиги ҳам айни шу мақсадларга хизмат қилади.  

Ҳафталик давомида АҚШнинг етук мутахассислари Болалар миллий тиббиёт марказида бўлиб, у ерда мураккаб жарроҳлик амалиётларини ўтказди. Муассасага АҚШнинг нуфузли Теннесси университетидан ташриф буюрган кардиохирург, реаниматолог, анестезиолог каби мутахассисликдаги 18 нафар америкалик шифокорлар марказ мутахассислари билан ҳамкорликда жарроҳлик амалиётлари ва маҳорат дарслари ўтказмоқда. Ҳозирги кунда Болалар миллий тиббиёт марказида болалар кардиохирургияси йўналишида катта муваффақиятларга эришган. Хусусан, кичик беморларда оддий туғма юрак нуқсони касалликлари тиғ теккизмасдан томир орқали кириб бориб бартараф этилмоқда. АҚШлик мутахассислар билан ҳамкорликда бу усулларда мураккаб турдаги жарроҳлик амалиётларига ҳам татбиқ этилиши кўзда тутилмоқда.  

Ўзбек ва америкалик мутахассислар томонидан Болалар миллий тиббиёт марказида 25 нафар юрак хасталигидан азият чекаётган болажонларда юқори технологияли амалиётлар ўтказилади. Улар орасида эндигина бир ойлик бўлган гўдаклар ҳам бор. Мазкур тадбирлардан кўзланган мақсад болалар кардиохирургия йўналишида илғор Америка стандартларини жорий этиш, ҳамкорлик қилишдир. Ҳафта якунида Нукусда ҳам ана шундай амалиётлар ўтказилиши режалаштирилган.    

Гўзал Сатторова, ЎзА