Бугун - 8 май эрта тонгида АҚШнинг Лас-Вегас шаҳридаги "T-Mobile Arena«да биз ўзбекистонлик бокс ишқибозлари учун узоқ кутилган профессионал бокс кечасининг барча жанглари қувончли ғалабалар билан ниҳоясига етди.

Ҳамюртларимиз Шаҳрам Ғиёсов ва Элнур Абдураимовлар АҚШ рингида ўзларининг ишончли ғалабаларига эришди.

Шаҳрам мексикалик Кристиан Гомесга қарши кечган жангда рақибини очколар ҳисобида мағлуб этди.

Профессионал боксдаги фаолияти мобайнида 13 жангда 13 ғалабага эришган истеъдодли боксчимиз баҳслар якунида журналистларга берган интервьюсида «Янги Ўзбекистонга янги ғалабалар, янги камарлар билан боришга ҳозирланаётганимдан хурсандман. Бизни қўллаб-қувватлаб турган барчага ўз миннатдорчилигимни билдираман,” дея таъкидлади Ғиёсов.

Профессионал боксчимиз Элнур Абдураимов эса ушбу бокс кечасида кубалик Мануэл Корреа билан 8 раундга мўлжалланган жангнинг 2-раундида рақибини нокаут эвазига мағлуб этди. Айтиш жоиз, кубалик енгилмас боксчи Корреа фаолиятидаги илк мағлубиятни ўзбекистонлик чарм қўлқоп устасидан қабул қилди.

Мазкур бокс оқшомининг марказий жангида яримоғир вазн тоифасида WBО камари соҳиби россиялик Дмитрий Бивол мутлақ Жаҳон чемпиони Саул Алваресга қарши жанг ўтказди. Америка бокс корчалонларининг башорати ўз тасдиғини топмади. Бивол АҚШга фақат ғалаба учун келганлигини исботлади.

12 раундга мўлжалланган баҳс Биволнинг устунлигида кечди. Буни натижалар ҳам кўрсатди. 115-113, 115-113, 115-113. Ушбу жангга тайёргарликнинг асосий босқичини Ўзбекистонда ўтказган Бивол профессионал боксдаги 20 ғалабасини нишонлади.

Шу тариқа енгилмас Саул Алварес шов-шувли тарзда профессионал боксда иккинчи бор мағлубият аламини қабул қилди.

Т. Рўзиев, ЎзА