Пойтахтимиздаги Республика олимпия ва паралимпия спорт турларига тайёрлаш марказида камондан отиш бўйича ўтказилган III “Алпомиш ва Барчиной” халқаро мусобақасида мамлакатимиз спортчилари 5 та медалга эгалик қилди.

Бугун, 19 май куни халқаро турнирнинг финал беллашувлари ва тақдирлаш маросими бўлиб ўтди.

Ўзбекистон Республикаси Спорт вазирлиги, Миллий гвардия қўмондонлиги ва Миллий олимпия қўмитаси мутасаддилари иштирок этган финал баҳслари якунида Ўзбекистон терма жамоаси аъзолари 4 та олтин ва 1 та кумуш медалга сазовор бўлди.

Тақдирлаш маросимида таъкидланганидек, 8 та давлатнинг 100 нафардан ортиқ мерганлари иштирокида ўтган мусобақалар спортчиларимизнинг маҳоратини ошириши билан бирга, ушбу спорт турининг оммавийлигини таъминлаш йўлида муҳим аҳамият касб этади.

Т.Рўзиев, ЎзА