Шу йили 17 сентябрь куни Ўзбекистон «Миллий тикланиш» демократик партияси раиси Алишер Қодиров Андижон вилоятидаги умумтаълим мактаблари фаолияти билан танишиш жараёнида Андижон шаҳридаги 13-умумтаълим мактабида ҳам бўлган эди. Шу куни мактабнинг бир гуруҳ педагоглари билан учрашиб, суҳбат ўтказилган.

Партиянинг Андижон вилоят Кенгаши томонидан ўтказилган «Аёл алласида-миллий тарбия» онлайн кўрик-танловида иштирок этиб, ғолибликни қўлга киритган ушбу мактабнинг бошланғич синф ўқитувчиси Мархабат Хошимова гўзал алла ижро этиб, партия лидерида алоҳида таассурот қолдирди.

Алишер Қодиров фахрий устознинг ижроси унга болалиги, ўқувчилик йиллари, хусусан биринчи ўқитувчисини ёдига солганини таъкидлаб, «Менинг биринчи ўқитувчим бор эди, худди сизга ўхшар эди. Партадошим билан битта ўчиргич туфайли ўртада низо келиб чиққанини эслайман. Ўшанда биринчи ўқитувчимиз бировнинг ҳаққи бировга буюрмаслигини айтган эдилар. Партадошимга танбеҳ берганлари, чиройли қилиб тушунтирганлари ҳамон эсимда. Ўшанда илк бор ҳаром нима, ҳалол нима деган саволларимизга жавоб олгандик» дея эслади.

1 октябрь «Устоз ва мураббийлар куни» муносабати билан партия лидери ўзининг биринчи ўқитувчисига ўхшайдиган, бошланғич синф ўқитувчиси Мархабат Хошимовага байрам совғаларини юборди.