Термиз туманида яшайдиган С.Жўраев 2021 йил суднинг ижро ҳужжати асосида вояга етмаган бир фарзандининг моддий таъминоти учун алимент тўлаш мажбуриятини олган. Бироқ, алимент тўлашдан бўйин товлаб келган.

МИБ Сурхондарё вилоят бошқармасидан маълум қилишларича, қарздор ота йиғилиб қолган 32 миллион сўмга яқин алимент пулини тўламай келгани учун маъмурий жазо қўлланилган. Бундан тўғри хулоса чиқармаган С. Жўраевга нисбатан жиноят иши қўзғатилган.

Мажбурий ижро бюроси вилоят бошқармаси давлат ижрочилари олиб борган суриштирув ҳаракатлари чоғида алиментчи ота собиқ турмуш ўртоғи билан ўзаро келишиб, фарзандининг келажаги учун Термиз туманининг Тинчлик маҳалласидаги қурилиши тугалланмаган беш хонали уйини жигарбандига расмийлаштириб берди. Ундирувчи эса алиментдан воз кечиб, ўзаро ярашганлари учун ижро ҳужжатини қайтариб олди.

Холмўмин Маматрайимов,

ЎзА мухбири