Озарбайжон Президенти Илҳом Алиев Испаниянинг Гранада шаҳрида Европа Иттифоқи, Франция ва Германия етакчилари иштирокида Арманистон Бош вазири Никол Пашинян билан кечадиган учрашувга бормасликка қарор қилишди.

“Turkic World” маълум қилишича, Франциянинг деструктив позицияси, шунингдек, мазкур учрашувда Туркиянинг иштироки бўйича Париж ва Берлин билан юзага келган келишмовчилик бунга сабаб бўлган. Бундан ташқари, кеча Ереванга борган Франция ТИВ раҳбари Катрин Колоннанинг Озарбайжонга қарши баёноти ҳам вазиятга таъсир қилган.

- Арманистоннинг ҳудудий яхлитлигига нисбатан ҳар қандай таҳдидга қарши жиддий жавоб берилажак, - деган вазир Гранадага боришдан аввал.

Бундай баёнот, албатта, Боку ва Ереван ўртасидаги вазиятни кескинлаштиради, Арманистонни ҳарбийлаштириш жараёнини тезлаштиришга хизмат қилади.

Колоннанинг “Франция доим Арманистон ёнида”, деган гапи ҳам Парижнинг “бетараф ва мустақил воситачи” эканлигини шубҳа остига қўяди.

Экспертлар фикрича, бундай муносабат расмий Парижнинг асл нияти ва мақсадини намойиш этиб, Жанубий Кавказда кескинликни кучайтиришдан манфаатдор эканини англатади, Арманистонни Озарбайжонга қарши террор урушига чорлашини кўрсатади, дейишмоқда. Пашинян эса 5 октябрда Алиев билан учрашишдан манфаатдор эканини таъкидлади.

- Биз жуда конструктив ва умидвор кайфиятда эдик, чунки муҳим ҳужжат имзоланиши кутилмоқда эди. Учрашув ўтказилмаслиги бизнинг айбимиз эмас. Тегишли ҳужжат тайёр, қулай фурсат бўлиши билан имзоланишига умид қиламан, деган бош вазир.

“Bloomberg” агентлиги ва Туркия ОАВ Президент Режеп Таййип Эрдоғаннинг Гранада саммитига бормаслигини тасдиқлашди. Бунинг сабаблари айтилмаган.

“Aydınlık” нашри хабарига кўра, Эрдоғанни Испанияга Бош вазир Педро Санчес телефон мулоқоти чоғида таклиф қилган.

Аброр Хон, ЎзА