24-26 aprel kunlari Toshkentda «INNOPROM. Markaziy Osiyo» Xalqaro sanoat ko‘rgazmasi bo‘lib o‘tdi. Unda MDH mamlakatlari korxonalari va xalqaro sanoat kompaniyalari ishtirok etdi. Ko‘rgazmada «Gazprombank» ham o‘z imkoniyatlarini namoyish etdi.
O‘zA muxbirining «Gazprombank»ning birinchi vitse-prezidenti Aleksandr Ushkov bilan bo‘lgan suhbati ushbu ko‘rgazma yakunlari va ikki mamlakat hamkorligiga bag‘ishlandi.
– Aleksandr Anatolevich, suhbatga rozilik bildirganingiz uchun tashakkur. «INNOPROM. Markaziy Osiyo» Xalqaro sanoat ko‘rgazmasida «Gazprombank» va «Servis-Telekom» kompaniyalar guruhi o‘rtasida O‘zbekiston Respublikasida minorali infratuzilma sohasida hamkorlik memorandumi imzolandi. Shu haqida batafsil ma’lumot bersangiz.
– Bank «Servis-Telekom» bilan 2015 yildan, ya’ni kompaniya tashkil etilganidan buyon hamkorlik qilib kelmoqda. «Servis-Telekom» ko‘z o‘ngimizda kichik kompaniyadan yirik infratuzilma operatorlaridan biriga aylandi. Uning boshqaruvida Rossiyaning deyarli barcha hududlaridagi 19 mingdan ortiq ob’ekt bor. Kompaniya hamkorlik davrida yirik loyihalarni amalga oshira oladigan ishonchli sherik ekanini ko‘rsatdi.
Kompaniya hozirgi rivojlanish bosqichida xalqaro ekspansiyaga yaqinlashdi va boshlanishiga O‘zbekistonning istiqbolli bozorini tanladi. So‘z mamlakatda o‘ziga xos mustaqil infratuzilmaviy operatorni yaratish haqida bormoqda. Dunyo bo‘yicha operatorlar minoralarga egalik qilishdan voz kechib, ularni ixtisoslashgan kommaniyalardan ijaraga oladi.
Biz O‘zbekistonda ham bozor shu tartibda rivojlanishiga ishonamiz. Memorandumning imzolanishi bankning O‘zbekiston bozoriga kirish bo‘yicha «Servis-Telekom» strategiyasiga sodiqligini va kompaniyani loyihaning birinchi kunlaridanoq qo‘llab- quvvatlashini ko‘rsatadi. Biz albatta, bank infratuzilma ob’ektlari qurilishini moliyalashtirishi haqida gapirayapmiz.
– Bu «Gazprombank» va O‘zbekiston o‘rtasida bu yo‘nalishdagi birinchi hamkorlikmi?
– «Servis-Telekom»ning O‘zbekiston bozoriga kirishi minora infratuzilmasi operator kompaniyasining tajribasi va bankning moliyalashtirish sohasidagi tajribasi asosida mavjud amaliyotni kengaytirishdir.
Xususan, 2021 yilda «Gazprombank» tomonidan «Servis-Telekom» kompaniyasining VEON telekommunikatsiya xoldingidan «Natsionalnaya bashennaya kompaniya» AJ ning to‘liq ulushini sotib olish bo‘yicha yirik (47 milliard rubl miqdoridagi) bitim imzolangan edi.
Boshqa sohalarga keladigan bo‘lsak, respublika uchun qator muhim loyihalarni amalga oshirdik. Umuman olganda, O‘zbekiston iqtisodiyoti rivojlanmoqda va biz yangi tashabbuslar nuqtai nazaridan, mahalliy bozorni istiqbolli deb hisoblaymiz.
– Xalqaro sanoat yarmarkasi «Gazprombank» faoliyatida qanday imkoniyatlarni ochadi?
– «Gazprombank» bu ko‘rgazmaning hamkorlaridan biridir. Biz ushbu tadbirni sanoatchilar va tadbirkorlarni bir joyga to‘playdigan sanoat ko‘rgazmasi faoliyati sohasidagi Rossiya “brendi” deb hisoblaymiz. Namoyishning Markaziy Osiyoga chiqishi nihoyatda muhim voqelik bo‘ldi. Bu Rossiya, O‘zbekiston, Qozog‘iston, Belorussiya, Qirg‘iziston va boshqa mamlakatlar o‘rtasida sanoat kooperatsiyasi uchun ajoyib maydonchadir. Ko‘rgazma doirasida olingan g‘oya va tashabbuslar, biznes-aloqalar va kelishuvlar Yevroosiyo iqtisodiy ittifoqi mamlakatlarida biznesni rivojlantirishga xizmat qilishiga ishonaman.
– Ko‘rgazma yakunlari haqidagi fikr-mulohazalaringiz?
– Uch kunlik ko‘rgazma davomida «Gazprombank» guruhi turli viloyatlar hokimlari va biznes vakillari bilan bir nechta samarali uchrashuv va muzokaralar o‘tkazdi. Shuningdek, turli mavzular bo‘yicha davra suhbatlari va muhokamalarda ham ishtirok etdik.
Masalan, “Yoqilg‘i energetika majmuasida xalqaro texnologik hamkorlik” mavzusidagi uchrashuvda ijrochi vitse-prezident – bank shartnoma bo‘limi departamenti boshlig‘i Oleg Melnikov va Ural mashinasozlik kimyo zavodining bosh direktori Tamara Kobaladze ishtirok etdi.
Men davra suhbatida bank tomonidan Qozon shahridagi «Ximgrad» texnopolisining moliyalashtirilishi va O‘zbekistonda bu amaliyotlarni muvaffaqiyatli qo‘llash haqida so‘zlab berdim. Umuman olganda, Toshkentdagi namoyish juda qizg‘in o‘tdi.
O‘zA mubiri
Nasiba ZIYODULLAEVA suhbatlashdi.