Қашқадарё вилояти Муборак туманидаги “Алан” конида 2-сонли Сиқув компрессор станцияси фойдаланишга топширилди.

Шу муносабат билан ташкил этилган тантанали тадбирда соҳа ва кенг жамоатчилик вакиллари ҳамда хорижлик меҳмонлар иштирок этди.

“Ўзбекнефтгаз” АЖ бошқаруви раиси Меҳриддин Абдуллаев “Алан” конида янги қурилган паст босимли Сиқув компрессор станциясининг аҳамиятига алоҳида эътибор қаратди.

– Ушбу кондаги қолдиқ газ захирасини (25 миллиард куб метр) максимал даражада қазиб олиш мақсадида иккинчи сиқув компрессор станциясини қуришга қарор қилдик, – деди М.Абдуллаев. 

– Лойиҳа бош пудратчиси ва ҳамкоримиз “ENTER Engineering” компанияси томонидан қисқа муддатда қиймати 75 миллион долларлик технологик объект қуриб битказилди. Замонавий газ-турбина ускуналари ва компрессорлар етакчи хорижий компаниялар, яъни АҚШнинг “Baker Hughes General Electric”, Украинанинг “Моторсич”, Туркиянинг “Akcelik”, Хитойнинг “Denair Energy” ва бошқа компаниялар томонидан етказиб берилди. Мазкур қурилманинг ишга туширилиши натижасида кунлик қўшимча 1 миллион метр куб газ қазиб олиш имкони яратилди.

Ўзбекистон Республикаси Президентининг 2017 йил 26 январдаги «2017 йилда Республикада нефть, нефть маҳсулотлари, табиий газ ва суюлтирилган газ ишлаб чиқариш ҳамда истеъмол қилиш тўғрисида»ги қарори ижроси доирасида қурилган паст босимли сиқув компрессор станцияси “Ўзбекнефтгаз” АЖ, “Natural Gaz-Stream” қўшма корхонаси ва “ERIELL OILFIELD SERVICES MIDDLE EAST DMCC” компанияси хамкорлигида амалга оширилди.

Таъкидлаш керакки, Муборак нефть ва газ қазиб чиқариш бошқармасининг “Алан” сиқув компрессор станцияси кунлик 9,137 миллион метр кубгача саноат газини утилизация қилиш имкониятига эга. 2021 йилда ушбу кондан 2,771 миллиард метр куб табиий газ ва 69,6 минг тонна газ конденсати қазиб олиш кўзда тутилган.

Тадбир якунида ушбу станция қурилишида фаоллик кўрсатган ишчи-ходимларга эсдалик совғалари топширилди.

Насиба ЗИЁДУЛЛАЕВА, ЎзА