Тиббиёт хабарлари – қисқа сатрларда

ССВ ҳузуридаги "Фармацевтика маҳсулотлари хавфсизлиги маркази" давлат муассасасининг Фармацевтика фаолиятини лицензиялаш бошқармаси томонидан сифатсиз ва қалбакилаштирилган дори воситалари муомаласига чек қўйиш мақсадида навбатдаги назорат тадбирлари ўтказилди. 

Текширувда Тошкент вилояти Тошкент туманида жойлашган “AKROM-MED-FARM” МЧЖга тегишли дорихонанинг лицензия талаб ва шартларини бузганлик ҳолати аниқланди. 

Ҳолат юзасидан “AKROM-MED-FARM” МЧЖга дори воситалари ва тиббий буюмларни чакана реализация қилиш учун 2022 йил 16 августда берилган 916-сонли лицензияни бекор қилиш тўғрисида "Фармацевтика маҳсулотлари хавфсизлиги маркази" ДМнинг Зангиота туманлараро иқтисодий судига киритган даъво аризаси суднинг тегишли ҳал қилув қарори билан қаноатлантирилди. Ҳамда “AKROM-MED-FARM” МЧЖга берилган лицензия бекор қилинди.

Амалдаги қонунчилик хужжатларига мувофиқ, мазкур дорихона лицензияси тугатилган дорихоналар манзиллари ва қонун бузилишларига бевосита алоқадор ходимлар (провизорлар, фармацевтлар)нинг ягона реестрига киритилди.

***

“Фармацевтика маҳсулотлари хавфсизлиги маркази“ ДМ директорининг ўринбосари Нозим Бердиев бошчилигида мутахассисллар “Swissmedic” – дори воситалари ва тиббий техникаларни тартибга солиш бўйича Швейцария Миллий агентлигида малака оширмоқда. ЖССТ (WHO) малака ошириш дастури доирасида ташкил этилган мазкур тренингда мамлакатимиздан ташқари Ангола, Колумбия, Куба, Ҳиндистон ва Жанубий Африка каби давлатларнинг фармацевтика соҳасини тартибга солиш миллий органлари делегациялари ҳам иштирок этмоқда.

Ушбу тренинг глобал стандартлар асосида дори воситалари ва тиббий буюм ва тиббий техникани рўйхатдан ўтказиш, уларнинг хавфсизлиги ва самарадорлигини баҳолаш, шунингдек, сифат менежменти тизимини олиб бориш ва назорат жараёнларини чуқурроқ ўрганишга қаратилган.

Тренинг доирасида иштирокчилар “Swissmedic” тартибга солиш тизими, дори воситаларининг хавфсизлигини таъминлашда қўлланиладиган илғор технологиялар, тиббий маҳсулотларни назорат қилиш механизмлари ҳамда фармацевтика саноатининг халқаро миқёсда ўсиши ва интеграциялашуви масалаларини ўрганмоқда. 

“Swissmedic”да ўрганилган халқаро тажриба юртимизда фармацевтика маҳсулотларини рўйхатдан ўтказиш ва клиник синовлар ўтказиш жараёнларини такомиллаштириш, шунингдек, аҳолига тақдим этилаётган дори воситаларининг сифатини таъминлашга хизмат қилади.

***

Фармацевтика маҳсулотлари хавфсизлиги марказида бўлиб ўтган Экспертлар кенгаши йиғилишида маҳаллий ва хорижий давлатлар ишлаб чиқарувчилари тақдим этган 13 номдаги дори воситалари, 89 номдаги тиббий буюмлар ва тиббий техника давлат рўйхатидан ўтказилди. 13 номдаги дори воситалари ва 3 номдаги тиббий буюм ва тиббий техникани рўйхатдан ўтказиш рад этилди. 

Давлат рўйхатидан ўтган 20 номдаги дори воситалари ва 8 номдаги тиббий буюмлар ва тиббий техникаларнинг рўйхатдан ўтказилганлик гувоҳномалари ҳамда рўйхатдан ўтказиш ҳужжатларига ўзгартириш ва қўшимчалар киритилди. 1 номдаги дори воситасининг рўйхатдан ўтказилганлик гувоҳномаси ҳамда рўйхатдан ўтказиш ҳужжатига ўзгартириш ва қўшимчалар киритиш рад этилди. 13 номдаги дори воситалари, 23 номдаги тиббий буюмлар ва тиббий техниканинг рўйхатдан ўтказилганлик гувоҳномасининг амал қилиш муддати узайтирилди.

Шунингдек, 3 номдаги дори воситасининг рўйхатдан ўтказилганлик гувоҳномасининг амал қилиш муддатини узайтириш рад этилди. 3 номдаги дори воситалари клиник тадқиқотлар ўтказишга тавсия этилди.

Моҳигул Қосимова, ЎзА