«Ўзбекистон аккредитация маркази» ДУК томонидан ўтган йил давомида жами 215 та орган аккредитациядан ўтказилган. Жумладан, 135 та синов ва калибрлаш, 34 та қиёслаш лабораторияси, 36 та маҳсулотни ва менежмент тизимларини сертификатлаштириш органи, 4 та инспекция органи аккредитациядан ўтказилди.

Шунингдек, ўтган йил давомида тасдиқланган инспекция назоратини ўтказиш режа графигига мувофиқ 200 та органда инспекция назорати ўтказилди. Улардан 48 та аккредитация гувоҳномасининг амал қилиш муддати вақтинча тўхтатилган, 11 тасиники тугатилган, 141 тасиники тасдиқланган.

Ўтган йил халқаро доирада ҳам сермаҳсул йил бўлди. Хорижий давлатларнинг аккредитация идоралари билан ҳамкорликни ривожлантириш доирасида Тожикистон аккредитация идораси билан Англашув меморандумлар имзоланди. 

"2022 йил 14 сентябрь куни «Ўзбекистон аккредитация маркази» ДУК нуфузли ташкилот — Лабораториялар аккредитацияси бўйича халқаро ҳамкорлик (ILAC)нинг тўла ҳуқуқли аъзоси сафига қабул қилинди, – дейди Марказ директори ўринбосари Зайниддин Аҳмедов. – ILAC MRA битими доирасида тан олишга эришди. ISO/IEC 17025 синов, ISO/IEC 17025 калибрлаш соҳаларда қўлланилади. Шунингдек, жорий йилнинг 28 сентябрь куни, Халқаро аккредитация форумига (IAF) тўла ҳуқуқли аъзоси сафига қабул қилинди. IAF МLA битими доирасида 6 та йўналишда эътироф қилинди. Корея Аккредитация Кенгаши (KAB) билан 2022-2023 йиллар учун ҳамкорлик режаси имзоланди. Эътиборли жиҳати шундаки, жараёнларни рақамлаштиришни кенгайтириш мақсадида «Е-akkreditatsiya” ахборот тизимини жорий этилиб, ишга туширилди. 2022 йил давомида тизим орқали 110 та ариза қабул қилиниб, улардан 64 тасининг ижроси таъминланди, 46 таси бўйича ишлар давом этмоқда.  

[gallery-10372]

Миллий матбуот марказида «Ўзбекистон аккредитация маркази» ДУК томонидан ўтказилган матбуот анжуманида «Мувофиқликни баҳолаш органларини аккредитация қилиш тўғрисида»ги қонуни лойиҳаси ишлаб чиқилиб, Ўзбекистон Республикаси Олий Мажлис Қонунчилик палатасида ва Сенатида ҳимояси таъминлангани қайд этилди.  

Шунингдек, жорий йилда «Мувофиқликни баҳолаш органларини аккредитациядан ўтказиш тўғрисида»ги қонун тасдиқлангандан сўнг, белгиланган аккредитация органи қошида ташкил этиладиган Аккредитация кенгаши низоми ва таркибини, Аккредитация бўйича техник қўмиталар тўғрисидаги ҳамда Аккредитация комиссияси ҳақидаги низомларни қайта ишлаб чиқилиши режалаштирилган. 

APAC ҳамкорлигида ISO/IEC 17043 халқаро стандарти бўйича халқаро илмий-амалий семинар ташкил этилиши кўзда тутилган. Шунингдек, Корея аккредитация кенгаши, Туркия Ҳалол аккредитация агентлиги, Тожикистон давлат аккредитация маркази билан ҳамкорлик доирасида тадбирлар ташкил этиш ҳам режага киритилган.

Шаҳноза Маматуропова, Ойбек Пардаев (сурат), ЎзА