Мамлакатимизда спортни ривожлантириш, ўсиб келаётган ёш авлодни ҳар томонлама баркамол инсонлар этиб вояга етказиш, уларнинг иқтидор ва салоҳиятини юзага чиқариш, халқаро спорт ареналарида Ватанимиз шарафини муносиб ҳимоя қилишга қодир спортчиларни тарбиялашга қаратилган доимий эътибор ва ғамхўрлик самарасида улкан муваффақиятларга эришаётган ёшлар сафи тобора кенгаймоқда.

Ана шундай спортчилардан бири оғир атлетика бўйича Осиё ва Олимпия ўйинлари, жаҳон ҳамда қитъа чемпионатлари ғолиби Акбар Жўраевдир. Акбар полвон 1999 йил 8 октябрь куни Тошкент вилоятининг Ғазалкент туманидаги Сойлиқ қишлоғида туғилган. Қайд этиш жоиз, ушбу қишлоқ терма жамоамиз учун бир қатор маҳоратли атлетларни етказиб берган. Жумладан, Акбарнинг ўзи оғир атлетика бўйича ўсмирлар ўртасидаги Осиё чемпиони бўлган акаси Азиз Жўраевга қизиқиб, ушбу спортга кириб келган ва мазкур спорт турининг илк сирларини биринчи мураббийи Фарҳод Мирзажановдан ўргана бошлаган.

Туман, шаҳар ва республика миқёсидаги мусобақаларда тобланган полвонимиз 2017 йилда терма жамоамиз аъзосига айланди ва халқаро майдондаги илк муваффақиятига 2018 йилда эришди. Акбар Жўраев ўшанда ёшлар ўртасида ўтган Осиё чемпионатида олтин медалга сазовор бўлди. Шу йилнинг ўзида Тошкентда ўтган U20 жаҳон чемпионатида эса кумуш медални қўлга киритди.

Шунингдек, Акбар Жўраев бугунга қадар ўтган мусобақаларда бир қатор ютуқларга эришган. Жумладан, Акбар полвон “Токио-2021” ва “Париж-2024” Олимпия ўйинларида олтин ҳамда кумуш медалларни қўлга киритган. Шунингдек, Токиода ташкил этилган Олимпиада рекордини янгилаган. 2023 йилда Хитойнинг Ханчжоу шаҳрида бўлиб ўтган Осиё ўйинларида кумуш медалга сазовор бўлган. Жаҳон кубогидаги ягона олтин медалига эса ўтган йили Таиландда эришган.

Полвонимиз мамлакатимиз оғир атлетикачилари орасида жаҳон чемпионатларида медаль жамғариш борасида улкан ғалабаларни қайд этаётган саноқли спортчилардан биридир. У ёшлар тоифасидаги дунё биринчиликларида дастлаб 2018 йили Тошкентда ўтган чемпионатда кумуш, 2019 йили эса Фолкленд ороллари мезбонлик қилган мусобақада олтин медалга эга бўлган.

Катталар ўртасидаги жаҳон чемпионатларида эса 2017 йили Ашхободда 1 та олтин, 2019 йили Паттайяда 1 та кумуш, 2021 йили Тошкентда 3 та олтин, 2023 йили Ар-Риёдда 2 та олтин ва 1 та кумуш медалга сазовор бўлган. Жорий йилда Акбар Жўраев Норвегиянинг Форде шаҳрида оғир атлетика бўйича ташкил этилган жаҳон чемпионатида қатнашди.

Хусусан, 110 килограммгача бўлган вазн тоифасидаги беллашувларда иштирок этган спортчимиз даст кўтариш машқида 196 килограмм натижа билан жаҳон рекордини ўрнатди. Силтаб кўтаришда эса 232 килограмм натижа билан тенгсиз бўлиб, ҳар икки йўналишда ва 428 килограмм кўрсаткич билан умумий икки кураш бўйича биринчи ўринни эгаллаб, жами учта олтин медалга эга чиқди.

Шу тариқа Акбар полвон беш йил ичида кетма-кет ўтган жаҳон чемпионатларида ғолиб бўлган оғир атлетикачимиз сифатида тарихимиз зарварақларидан муносиб ўрин олди.

Дарвоқе, 2019-2025 йиллар оралиғида ўтказилган Осиё чемпионатларида иккитадан олтин ва кумуш, ҳамда бир бронза медали билан тақдирланган.

Акбар Жўраев қайд этаётган улкан муваффақиятлари натижасида Президентимиз томонидан 2021 йилда “Ўзбекистон ифтихори” ва 2024 йилда “Ўзбекистонда хизмат кўрсатган спортчи” фахрий унвонлари билан тақдирланди.

– Юртимизда ёшларга қаратилаётган улкан эътибор ва яратилаётган шароитлар самарасида дунё бўйлаб Ватанимиз шарафини юксалтирмоқдамиз, – дейди Акбар Жўраев. – Мени ҳар томонлама қўллаб-қувватлаган Президентимизга, халқимизга, яқинларим ва мураббийларимга самимий миннатдорлигимни изҳор этаман. Менинг ғалабам барча юртдошларимизнинг ғалабасидир.

Бугун Акбар Жўраевдек ўз олдига катта мақсадларни қўяётган ёшларимиз сафи тобора кенгаймоқда. Уларнинг энг олий мақсади доимо Ўзбекистон байроғини кўкларга кўтаришдир.

Жавоҳир Тошхўжаев, ЎзА