Akademik litseylarga kirish test sinovlari an’anaga ko‘ra, 2 ta fan va intellektual qobiliyat darajasi (IQ)ni aniqlash bo‘yicha o‘tkaziladi.

2023/2024 o‘quv yili uchun akademik litseylarga qabul parametrlarining ta’lim yo‘nalishlari va o‘qitish tillari bo‘yicha taqsimlanishi tasdiqlangan bo‘lib, unga ko‘ra 71 ta litseyga 11 ming  544 ta o‘zbek, 2 ming 678 ta rus hamda 468 ta qoraqalpoq tillari uchun kvotalar ajratildi.  

O‘zbekiston Respublikasi Oliy ta’lim, fan va innovatsiyalar vazirligi huzuridagi Bilim va malakalarni baholash agentligi tomonidan joriy yilning  24 iyul kuni akademik litseylarga 2023-2024 o‘quv yili uchun kirish test sinovlari o‘tkazildi.  

Test sinovlari respublikada 29 ta katta sig‘imli binoda 2 smenada tashkil etilib, unda 28 ming nafardan ortiq talabgor ishtirok etdi. Bunda talabgorlarga har bir fandan 20 tadan jami 60 ta test topshirig‘i va ularni ishlash uchun 1 soatu 50 daqiqa vaqt berildi.    

Bilim va malakalarni baholash agentligi matbuot xizmatining ma’lum qilishicha, test sinovi natijalari agentlik tomonidan 5 kun ichida hisoblanib, Oliy ta’lim, fan va innovatsiyalar vazirligiga taqdim etilganidan so‘ng e’lon qilinadi.  

Ma’lumot o‘rnida ta’kidlash lozimki, barcha test topshiruvchilar uchun topshiriqlar soni jami 60 tadan iborat bo‘lgan. Shundan 20 tasi o‘quvchining intellektual qobiliyat darajasi (IQ) ni aniqlash bo‘yicha hamda ta’lim yo‘nalishlariga mos ikkita fan bo‘yicha esa, jami 40 ta test savollaridan iborat bo‘lgan.  

Muhayyo Toshqorayeva, O‘zA