“Google”нинг “аждоди” ҳисобланган “Alphabet” 2025 йил бошида тарихий чўққига эришди — бозорда қиймати $4 триллионга етиб, “Nvidia”, “Microsoft” ва “Apple” қаторидаги тўртинчи йирик компания бўлди. Маълумки, охирги йиллар давомида сунъий интеллект (AI)га бўлган талаб технология бозорини янги рекордларга етаклади. Инвесторлар AI ривожланаётган компанияларга миллионлаб долларлик инвестициялар киритди, “Alphabet” эса бу жараёнлардан унумли фойдаланди.
Сўнгги ўсишнинг асосий омилларидан бири – “Apple” компаниясининг “Siri” тизимини янгилашда “Google”нинг “Gemini AI” моделидан фойдаланиш қарори бўлди. Бу ҳам “Alphabet”нинг AI соҳасида етакчи эканини тасдиқлайди. “Gemini 3” модели илғор график ва матнли жавоб бериш имкониятлари ҳамда дастурлаш қобилиятларини кучайтириб, рақобатчиларни орқада қолдирди.
“Alphabet”нинг молиявий имкониятлари унга янги стартаплар устидан устунлик беради. “OpenAI” ва “Anthropic” каби компаниялар доимий молиялаштиришга муҳтож бўлса, “Alphabet” ўз ресурслари билан инновацияни давом эттиради. Шу билан бирга, “Google” қидирув тизимига AI модини интеграция қилган, бу эса интернет бозорида янги рақобатни кучайтирди.
Таҳлилчилар фикрича, “Alphabet” рақобатни муваффақиятли бошқараётган бўлса-да, юқори баҳолар билан бирга, келаётган хавфларга ҳам эътибор бериши керак. Компания қидирув тизими, “YouTube” ва “Google Cloud” орқали даромадларини оширмоқда. “YouTube” рекламаcи 15% ўсиб, 10,26 миллиард доллар даромад келтирди, “Google Cloud” эса 34% ўсиш билан 15,2 миллиард долларга етди.
“Cloud” соҳасида “Amazon AWS” ва “Microsoft Azure” билан кучли рақобат мавжуд бўлса-да, “Alphabet” кичик компаниялар учун AI чипларини етказиб бериш орқали бозор улушини кенгайтирмоқда. Бу стратегия компаниянинг молиявий барқарорлигини таъминлайди ва инновацион имижини мустаҳкамлайди.
Экспертлар таъкидлаганидек, “Alphabet” — бу бир нечта етакчи бизнесларнинг йиғиндиси. Қидирув рекламалари ва “YouTube” даромадларини барқарор ушлаб туриш ҳамда “Cloud” бозоридаги ўсишни давом эттириш орқали компания ўз “тезлигини” сақлаши мумкин. “Alphabet”нинг $4 триллионлик қийматга етиши фақат рақам эмас, балки AI ва рақамли инновацияда етакчи бўлиш стратегиясининг натижасидир.
Мусулмон Зиё, ЎзА