Сенатнинг Фан, таълим ва соғлиқни сақлаш масалалари қўмитаси мажлисида сил касаллигининг олдини олиш бўйича ишлаб чиқилган қонунчиликка таклифлар масъул вазирлик ва идоралар, фуқаролик жамияти институтлари ҳамда оммавий ахборот воситалари вакиллари иштирокида муҳокама қилинди.

Қайд этилганидек, 2001 йилда қабул қилинган “Аҳолини сил касаллигидан муҳофаза қилиш тўғрисида”ги қонун фтизиатрия йўналишида амалга оширилган ислоҳотлар натижасида қатор ўзгартиришлар киритишни талаб этмоқда.

Хусусан, силга қарши кураш муассасаларида даволаниш учун электрон навбат бўйича йўлланма олиш тизими сил касаллигининг юқумли шаклига чалинган беморларни ушбу муассасаларга эрта жойлаштириш имкониятини чеклаб қўймоқда.

Бундан ташқари, бугунги кунда амалда қўлланилаётган сил касаллигини диаскинтест ва гамма-интерферон ёрдамида аниқлаш усуллари, сил касаллигининг сўнгги босқичида (терминал) беморларга керак бўладиган, касалликнинг оғир аломатларини енгиллаштириш, беморнинг ҳаёт сифатини яхшилаш, руҳий ва ижтимоий муаммоларини ҳал этишга қаратилган паллиатив тиббий ёрдам кўрсатиш қонунда акс этмаган. Шунингдек, ушбу соҳада давлат органлари ва ташкилотларининг ваколатлари ҳамда фуқаролик жамияти институтларининг иштироки ҳам кўрсатилмаган.  

Сенаторлар таъкидлаганидек, ишлаб чиқилган таклифлар қонунни янада такомиллаштириш, аҳолини сил касаллигидан комплекс ҳимоя қилиш ва сифатли даволаш тизимини яратишга ҳамда мазкур касалликдан муҳофаза қилишда жамоатчилик назоратини таъминлашга хизмат қилади.

Муҳокама якунида қонунчилик таклифи сифатида Қонунчилик палатасига киритиладиган масала бўйича Сенат кенгашига таклиф бериш юзасидан келишиб олинди.

Н.Абдураимова, ЎзА