O‘zbekiston Respublikasi Prezidentining qarori

Aholi va tibbiyot tashkilotlarining sifatli dori vositalari hamda tibbiy buyumlar bilan ta’minlanganlik darajasini oshirish, sohada ta’sirchan jamoatchilik nazoratini olib borish uchun shart-sharoitlar yaratish, shuningdek, 2022 yil 18 mart kuni o‘tkazilgan O‘zbekiston Respublikasi Prezidentining sog‘liqni saqlash sohasi vakillari bilan “Tibbiyotdagi islohotlar – inson qadri uchun” mavzusidagi ochiq muloqoti doirasida belgilangan vazifalar ijrosini ta’minlash maqsadida:

1. Shunday tartib o‘rnatilsinki, unga muvofiq 2023 yil 1 yanvardan boshlab:

a) 1-ilovaga muvofiq ro‘yxatda belgilangan dori vositalaridan tashqari barcha yangi dori vositalari:

klinik tadqiqotlarning ijobiy natijasi asosida davlat ro‘yxatidan o‘tkaziladi. Bunda, alohida dori vositalarini klinik tadqiqotlarsiz davlat ro‘yxatidan o‘tkazish Sog‘liqni saqlash vazirligi tomonidan belgilangan tartibga muvofiq amalga oshiriladi;

joyiga chiqqan holda ishlab chiqarish sharoitlarining “Zarur ishlab chiqarish amaliyoti – GMP” talablariga muvofiqligi o‘rganilganidan so‘ng O‘zbekiston Respublikasida davlat ro‘yxatidan o‘tkaziladi;

b) quyidagilar bekor qilinadi:

retseptsiz beriladigan dori vositalarining ro‘yxatini Sog‘liqni saqlash vazirligi tomonidan tasdiqlash. Bunda, dori vositalarining retsept bo‘yicha va retseptsiz berilishi ularning tibbiyotda qo‘llanilishiga doir yo‘riqnomalarda belgilangan tartibda amalga oshiriladi;

dori moddalarini (substansiyalarni) davlat ro‘yxatidan o‘tkazish;

O‘zbekiston Respublikasidan tashqarida amalga oshirilgan dori vositalarining ro‘yxatdan o‘tkazish natijalarini tan olishda standart namunalarini talab etish;

v) Davlat tibbiy sug‘urtasi jamg‘armasi orqali moliyalashtiriladigan respublika darajasidagi davlat statsionar tibbiyot muassasalarida (keyingi o‘rinlarda – shifoxonalar) bemorlarni dori vositalari va tibbiy buyumlar bilan ta’minlash shifoxona orqali amalga oshiriladi. Bunda, alohida holatlarda shifoxonada bemorlar tomonidan olib kelingan dori vositalar va tibbiy buyumlarni ishlatishga ruxsat berish tartibi Sog‘liqni saqlash vazirligi tomonidan belgilanadi.

2. Belgilab qo‘yilsinki:

a) bemorlarni shifoxonada dori vositalari va tibbiy buyumlar bilan ta’minlash:

dastlab respublika darajasidagi shifoxonalarda 2023 yil davomida tajriba-sinov tariqasida amalga oshiriladi;

ularga xarajatlar smetasi bo‘yicha ajratilishi ko‘zda tutilgan mablag‘lar hisobidan kafolatlangan tibbiy xizmatlar va dori vositalari paketi doirasida xarid qilinadigan dori vositalari va tibbiy buyumlar bepul, qolgan hollarda pullik asosda shifoxonaga kirim qilingan narxlarda amalga oshiriladi. Bunda, shifoxona tomonidan xarid qilinadigan dori vositalarining narxi belgilangan ulgurji referent narxlaridan yuqori bo‘lmasligi lozim;

b) 2023 yil 1 iyuldan boshlab referent narxlari qayd etilmagan yoki qayd etilgan narxdan yuqori bo‘lgan dori vositalarini sertifikatlashtirish taqiqlanadi.

3. Sog‘liqni saqlash vazirligi 2022 yil yakuniga qadar:

a) 2025 yil 1 yanvargacha bo‘lgan muddatda davlat ro‘yxatidan o‘tkazmasdan majburiy sertifikatlashtirish sharti bilan tibbiyot amaliyotida qo‘llash va kiritishga ruxsat beriladigan, O‘zbekiston Respublikasida davlat ro‘yxatidan o‘tkazilgan analoglari mavjud bo‘lmagan dori vositalari va tibbiy buyumlar ro‘yxatini tasdiqlasin. Bunda, mazkur dori vositalari va tibbiy buyumlar ularning O‘zbekiston Respublikasida analoglari davlat ro‘yxatidan o‘tkazilgan kundan boshlab uch oy muddatda Sog‘liqni saqlash vazirligi tomonidan tasdiqlangan ro‘yxatdan chiqarilishi lozim;

b) bemorlarni davolash uchun talab etiladigan dori vositalari va tibbiy buyumlarning to‘liq shifoxona tomonidan xarid qilinishini inobatga olib:

shifoxonalarda dori vositalari va tibbiy buyumlar xaridi bo‘yicha mutaxassis lavozimi joriy etilishini;

shifoxonalar tomonidan birlamchi zarur bo‘ladigan zaxiraning Davlat byudjeti va byudjetdan tashqari mablag‘lar hisobidan shakllantirilishini ta’minlasin;

v) Davlat byudjeti va byudjetdan tashqari mablag‘lar hisobidan xarid qilingan dori vositalari va tibbiy buyumlarning kunlik qoldig‘i hamda narxlari manbalar kesimida shifoxonalarning rasmiy veb-saytlarida joylashtirilishini hamda muntazam yangilab borilishini ta’minlasin.

4. Shifoxonalar tomonidan dori vositalari va tibbiy buyumlarning xaridi uchun to‘lovlar byudjet tizimi byudjetlari xarajatlari tasnifining I guruh xarajatlari uchun belgilangan muddatlarda ham amalga oshirilishiga ruxsat berilsin.

Moliya vazirligi Sog‘liqni saqlash vazirligining asoslangan hisob-kitoblariga muvofiq shifoxonalarni dori vositalari va tibbiy buyumlar bilan uzluksiz ta’minlash uchun talab etiladigan zarur mablag‘lar har yili Davlat byudjeti parametrlarida ko‘zda tutilishini ta’minlasin.

5. Belgilansinki, dori vositalarining chakana savdosida jamoatchilik nazoratini joriy etish maqsadida 2023 yil 1 maydan boshlab:

jismoniy shaxslar tomonidan sotib olingan dori vositalari uchun dorixonalar tomonidan taqdim etiladigan xarid chekining fiskal belgisi matritsali shtrix kod (QR-kod) yordamida skanerlash orqali soliq organlarining maxsus mobil ilovasida ro‘yxatdan o‘tkazilganda dori vositalari narxlari Farmatsevtika tarmog‘ini rivojlantirish agentligining axborot tizimidagi dori vositalarining chakana referent narxlari bilan avtomatik tarzda solishtiriladi;

matritsali shtrix kod (QR-kod) yordamida skanerlash natijasida dori vositalarining chakana narxlariga belgilangan ustamalar oshirib qo‘llanilganligi aniqlangan taqdirda, tegishli chora ko‘rish uchun bu haqida iste’molchilar huquqlarini himoya qilish uchun maxsus vakolat berilgan davlat organiga avtomatik ravishda xabar yuboriladi;

xarid cheki bo‘yicha narx dori vositasining chakana referent narxidan ortiq deb topilganda, ushbu ma’lumot asosida o‘tkazilgan tekshirish yakuniga ko‘ra huquqbuzardan belgilangan tartibda jarima undiriladi.

Bunda, xarid chekida sotib olingan dori vositalari va tibbiy buyumlarning to‘liq miqdorda ko‘rsatilmasligi savdo yoki xizmat ko‘rsatish qoidalari to‘g‘risidagi qonunchilikni buzish sifatida e’tirof etiladi.

6. Farmatsevtika tarmog‘ini rivojlantirish agentligi 2023 yil 1 martga qadar agentlikning byudjetdan tashqari mablag‘lari hisobidan dori vositalarining ishlab chiqarilishidan boshlab ularning iste’moli natijasigacha bo‘lgan jarayonlarni nazarda tutuvchi Farmatsevtika mahsulotlari hisobi va nazorati axborot tizimini joriy etsin.

Manfaatdor vazirlik va idoralar 2-ilovaga muvofiq tasdiqlangan ma’lumotlarning Farmatsevtika mahsulotlari hisobi va nazorati axborot tizimiga integratsiya qilinishini ta’minlasin.

7. Sanitariya-epidemiologik osoyishtalik va jamoat salomatligi xizmati Farmatsevtika tarmog‘ini rivojlantirish agentligi bilan birgalikda:

2022 yil yakuniga qadar biologik faol qo‘shimchalarni davlat ro‘yxatidan o‘tkazishda ularning xavfsizligi va tarkibini nazoratdan o‘tkazish bo‘yicha Vazirlar Mahkamasiga taklif kiritsin;

2023 yil 1 iyunga qadar O‘zbekiston Respublikasida davlat ro‘yxatidan o‘tkazilgan dori vositalarining tibbiyotda qo‘llanilishiga doir yo‘riqnoma hamda biologik faol qo‘shimchalarning elektron katalogini ishlab chiqsin va o‘zlarining rasmiy saytlariga joylashtirsin.

8. Hisob palatasi Bosh prokuratura bilan birgalikda mazkur qarorda belgilangan vazifalarning to‘liq va sifatli ijro etilishi yuzasidan doimiy nazorat o‘rnatsin hamda har yarim yilda O‘zbekiston Respublikasi Prezidenti Administratsiyasiga axborot kiritib borsin.

9. Sog‘liqni saqlash vazirligi:

bir oy muddatda biologik faol qo‘shimchalar, oziq-ovqat qo‘shimchalari, biologik vositalar va materiallarni chetdan keltirish hamda ishlab chiqarishga Yagona interaktiv davlat xizmatlari portali orqali ruxsatnoma berish tartibini nazarda tutuvchi qaror loyihasini Vazirlar Mahkamasiga kiritsin;

ikki oy muddatda “Fuqarolar sog‘lig‘ini saqlash to‘g‘risida”gi va “Dori vositalari va farmatsevtika faoliyati to‘g‘risida”gi O‘zbekiston Respublikasining qonunlariga Sog‘liqni saqlash vazirligi tomonidan retseptsiz beriladigan dori vositalarining ro‘yxatini tasdiqlash hamda dori moddalarini (substansiyalarni) davlat ro‘yxatidan o‘tkazishni nazarda tutuvchi normani bekor qilish yuzasidan o‘zgartirishlar kiritishga doir qonun loyihasini Vazirlar Mahkamasiga kiritsin;

uch oy muddatda manfaatdor vazirlik va idoralar bilan birgalikda qonunchilik hujjatlariga ushbu qarordan kelib chiqadigan o‘zgartirish va qo‘shimchalar to‘g‘risida Vazirlar Mahkamasiga takliflar kiritsin.

10. Aholini sifatli dori vositalari bilan ta’minlash yuzasidan chora-tadbirlarni amalga oshirish bo‘yicha “yo‘l xaritasi” 3-ilovaga muvofiq tasdiqlansin.

11. O‘zbekiston Respublikasi Prezidentining va O‘zbekiston Respublikasi Hukumatining ayrim hujjatlariga 4-ilovaga muvofiq o‘zgartirish va qo‘shimchalar kiritilsin.

12. Mazkur qaror ijrosini samarali tashkil qilishga mas’ul va shaxsiy javobgar etib sog‘liqni saqlash vaziri B.A.Musayev belgilansin.

Qaror ijrosini nazorat qilish va ijro uchun mas’ul tashkilotlar faoliyatini muvofiqlashtirish O‘zbekiston Respublikasining Bosh vaziri A.N.Aripov va O‘zbekiston Respublikasi Prezidenti maslahatchisining birinchi o‘rinbosari L.N.Tuychiyev zimmasiga yuklansin.

O‘zbekiston Respublikasi

      Prezidenti                                                                               Sh.MIRZIYOEV

Toshkent shahri,

2022 yil 26 oktyabr