Аввал хабар берилганидек, жорий йилнинг 3 январь куни ўтказилган назорат тадбирида Янгийўл туманида жойлашган “Ҳамкор газ сервис” МЧЖга қарашли автомобилларга газ тўлдириш компрессор шохобчаси табиий газ ва электр энергиясидан ноқонуний фойдаланиб келган.

Мазкур АГТКШ белгиланган ўчириш графигига риоя этмаган ҳолда фаолият кўрсатаётгани ҳамда шохобчанинг газ ҳисоблаш ускунасига ташқи таъсир кўрсатилгани, яъни шохобча фаолият кўрсатаётган бўлса-да ускуна ишламаётгани (кўрсаткичлари “0” ҳолатда эканлиги) аниқланган эди.  

Ўтказилган экспертиза натижасига кўра, шохобчанинг газ ҳисоблаш ускунасига кўрсаткичларни ўзгартириш мақсадида ташқи таъсир кўрсатилгани ўз тасдиғини топди.  

Унга асосан шохобча 2022 йилнинг август ойидан 2023 йилнинг 3 январь кунига қадар 10 миллиард 791 миллион сўмлик жами 11 миллион метр куб табиий газдан ноқонуний фойдаланиб келган.  

Эслатиб ўтамиз, вилоят прокуратураси томонидан мазкур шохобча ва “Ўзтрансгаз” АЖ ҳудудий бошқармаси масъулларига нисбатан жиноят иши қўзғатилган.  

ЎзА