Кўргазмалар

Пойтахтимиздаги “Ўзэкспомарказ“ марказий кўргазмалар мажмуида очилган "Агро саноати – AgroWorld Uzbekistan 2023» 18-халқаро кўргазмасида 20 мамлакатдан 172 компания иштирок этмоқда.  

“Iteca Exhibitions” халқаро кўргазмалар компанияси ва бир қатор расмий ташкилотлар кўмагида ташкил этилган кўргазма қишлоқ хўжалиги соҳасидаги сўнгги ишланмалардан тортиб истеъмол маҳсулотини олишгача бўлган бутун ишлаб чиқариш занжирини битта майдонга жамлагани билан аҳамиятлидир.  

Таъкидлаш керакки, мамлакатимизда қишлоқ хўжалигини ривожлантириш, янги технологиялар ва инновацияларни, шу жумладан, қишлоқ хўжалиги ишлаб чиқарувчиларининг экспорт салоҳиятини оширишга қаратилган кенг кўламли чора-тадбирлар амалга оширилмоқда. Қишлоқ хўжалиги Ўзбекистон иқтисодиётининг етакчи тармоқларидан бири бўлиб, ЯИМнинг қарийб 21,4 фоизини ташкил этади.  

Кўргазма очилишида “Iteca еxhibitions” халқаро кўргазмалар компанияси бош директори Нигора Ҳасанова қайд этганидек, “AgroWorld Uzbekistan” кўргазмаси экспонатларнинг статик намойиши эмас, балки ўзгарувчан бозор талабларини акс эттирувчи мослашувчан платформадир.  

– Кўргазмада намойиш этилган қишлоқ хўжалиги саноати тармоқларининг кенг спектри, намуналар ва намойиш этилган ускуналар ва технологияларнинг ишлатиш мақсадининг турли хиллиги бунинг яққол далили. Шу маънода, кўргазма павильонларидан дон, омухта ем, иссиқхоналар, боғдорчилик, паррандачилик, чорвачиликка оид маҳсулотлар, ветеринария, шунингдек, чорва ва парранда сўйиш, гўшт хомашёсини бирламчи қайта ишлаш ускуналари, фермер хўжаликлари ва паррандачилик фабрикалари учун ускуналар, балиқчилик хўжаликлари учун технологиялари ўрин олган.  Бу маҳсулотлар Ўзбекистон, Австрия, Беларусь Республикаси, Бельгия, Буюк Британия, Германия, Дания, Иордания, Эрон, Испания, Италия, Қозоғистон, Хитой, Россия, Сербия каби давлатларнинг компаниялари томонидан тақдим этилмоқда.  Эътиборлиси, бу йил иштирокчилар географияси кенгайди. Иордания, Сербия, Нидерландия ва Словения компаниялари илк бор иштирок  этаяпти, – деди Н. Ҳасанова.  

[gallery-10991]

Шунингдек, кўргазмада Нидерландия миллий экспозицияси тақдим қилинмоқда. Ушбу экспозиция паррандачилик фермалари ва интенсив чорвачилик, инкубатор тухумларини ишлаб чиқариш, картошка омборларининг вентиляция тизимлари, совуқхоналар, мева боғларини лойиҳалаш, ўғитлар ва ўсимликларни биологик ҳимоя қилиш, иссиқхоналар, сабзавот уруғлари, мева ва сабзавотларни сақлаш, қадоқлаш каби маҳсулотларни тақдим этадиган 23 компаниядан иборатдир.  

Нидерландия қироллиги Қишлоқ хўжалиги, табиат ва озиқ-овқат сифати вазирлиги махсус вакили Фредерик Воссенаар “AgroWorld Uzbekistan 2023” халқаро кўргазмасининг расмий очилиш маросимида иштирок этганидан мамнун эканини билдирди.  

– Ўзбекистонда қишлоқ хўжалиги соҳаси анча яхши ривожланаётгани ва Нидерландия агробизнесининг мамлакатингизга қизиқиши ошиб бормоқда. Балки Нидерландия Ўзбекистонга нисбатан кичик давлатдир, лекин мен уларнинг қишлоқ хўжалиги соҳасида кучли эканлигига ишонаман. Масалан, Нидерландия қишлоқ хўжалиги маҳсулотларини экспорт қилиш бўйича дунёда иккинчи ўринда туради. Унинг агроэкспорти 2021 йилдаги 105 миллиард евродан 2022 йилда 121 миллиард еврогача ошди. Ўзбекистон қишлоқ хўжалиги маҳсулотларини экспорт қилишда ҳам улкан салоҳиятга эга. Бу борада Ўзбекистон ва Нидерландия ишончли шериклар, деб ҳисоблайман, – деди жаноб  Фредерик Воссенаар.  

Анъанага кўра, кўргазманинг иккинчи куни, яъни 16 мартда Ўзбекистон фермерлар, деҳқон хўжаликлари ва томорқа ер эгалари кенгаши кўмагида "Фермерлар куни" ўтказилади. Унда фермер ва деҳқон хўжаликлари раҳбарлари ҳамда бош мутахассислар учун кўргазма иштирокчилари билан учрашувлар ўтказилади.  

Насиба ЗИЁДУЛЛАЕВА, ЎзА мухбири