Ўзбекистон Республикаси Президентининг Туркия Республикасига расмий ташрифи доирасида икки давлат ўртасидаги иқтисодий ҳамкорлик янада фаоллашмоқда. Айни кунларда қишлоқ хўжалиги вазири Иброҳим Абдураҳмонов Туркияда хизмат сафарида бўлиб, етакчи компаниялар ва нуфузли ташкилотлар вакиллари билан қатор муҳим учрашувлар ўтказди.

Музокаралар жараёнида Ўзбекистонда 2026-2027 йилларда амалга оширилиши режалаштирилган янги инвестиция лойиҳалари муҳокама қилинди. Асосий эътибор қишлоқ хўжалиги техникалари ишлаб чиқариш, энг юқори сифатли уруғчиликни йўлга қўйиш, замонавий кўчатчилик тизимларини жорий этиш ҳамда инновацион иссиқхона мажмуаларини ташкил этишга қаратилди.

Хусусан, Hektaş Ticaret T.A.Ş. компанияси билан Тошкент вилоятида ўсимликларни ҳимоя қилиш воситалари ва органоминерал ўғитлар ишлаб чиқарадиган завод барпо этиш бўйича келишувга эришилди. Шунингдек, “Varnet Camsera CO LTD”  билан Бухоро вилоятида агротуризм йўналишида замонавий ботаника боғи ташкил этиш режалаштирилмоқда. Бундан ташқари Андижон вилоятида “Koch Erol Almus” компанияси билан газланмаган ичимлик суви ишлаб чиқариш лойиҳасини амалга ошириш бўйича дастлабки келишувлар имзоланди.

Шунингдек, “Doganlar” компанияси қишлоқ хўжалиги техникаларини маҳаллийлаштирилган ҳолда ишлаб чиқариш таклифини билдирди. “Arıcı Tarım Turizm ve İnşaat Malzeme” томонидан замонавий кўчатчилик марказларини ривожлантириш бўйича ташаббус илгари сурилди. “Armada Brend Seed LLC” эса элита уруғчилик соҳасида Ўзбекистонда истиқболли лойиҳаларни жорий этиш бўйича тақдимот ўтказди.  

Қайд этилишича, хорижий компаниялар вакилларининг жорий йил февраль-март ойларида Ўзбекистонга ташрифи режалаштирилган бўлиб, ушбу сафарлар лойиҳаларни амалий босқичга ўтказишга хизмат қилади.

Муҳайё Тошқораева, ЎзА