«Агробанк» АТБ томонидан «Коррупцияга қарши курашиш ҳафталиги» доирасида «Очиқ эшиклар куни» ўтказилди.

Оммавий ахборот воситалари вакиллари, банк ходимлари ҳамда талабалар иштирок этган учрашув Ўзбекистон Республикаси Коррупцияга қарши курашиш агентлиги билан ҳамкорликда ташкил этилди.

Тадбир доирасида банкнинг Комплеанс-назорат таркибий тузилмаси томонидан олиб борилаётган амалий ишлар ва коррупцияга қарши курашиш ҳолати билан яқиндан танишилди.

Бунда Президентимизнинг жорий йилнинг 12 январида қабул қилинган «Коррупцияга қарши курашиш ишларининг самарадорлигини рейтинг баҳолаш тизимини жорий этиш чора-тадбирлари тўғрисида»ги қарор дастуриламал бўлмоқда.

Хабарингиз бор, ушбу ҳужжатга кўра мамлакатимизда коррупциянинг олдини олиш ва унга қарши курашишда илғор хорижий тажрибалар кенг қўлланилиб, халқаро стандартлар жорий этилди. Ташкилотларнинг бу борадаги ишлари самарадорлигини ошириш мақсадида рейтинг баҳолаш индикаторлари ишлаб чиқилди.

Мазкур тадбирда ҳам Коррупцияга қарши курашиш агентлиги масъуллари томонидан ҳамкорликдаги ишларга бағишланган тақдимот намойиш этилиб, унда Агробанк тизимида коррупцияга қарши курашиш сиёсати, одоб-ахлоқ кодекси, манфаатлар тўқнашувини бошқариш тўғрисида низом, алоқа каналлари орқали коррупциявий хатти-ҳаракатлар тўғрисида регламент, коррупциявий хавф-хатарларни баҳолаш услубиёти каби ички меъёрий ҳужжатлар пухта ишлаб чиқилганлиги алоҳида таъкидланди.

Ўзбекистон Республикаси Коррупцияга қарши курашиш агентлиги, тижорат банки ҳамда оммавий ахборот воситалари вакиллари иштирокидаги «Очиқ эшиклар куни» тадбирида мавзуга тегишли кўплаб саволларга жавоблар берилди.

ЎзА