Коррупцияга қарши курашиш бўйича кўплаб ишлар амалга оширилаётганига қарамай, жамиятимиз бу иллатдан ҳали қутила олганича йўқ.

Коррупциявий ҳолатлар ҳақида сўз кетса, кўпчилик Коррупцияга қарши курашиш агентлигини тилга олмоқда. Чунки агентлик ташкил этилганидан сўнг жамоатчилик бу тузилма натижа кўрсатишига умид боғлай бошлади.

Хўш, агентлик қандай натижаларга эришмоқда?

Агентлик томонидан ўтказилган ўрганишлар натижалари бўйича вазирлик, ҳуқуқни муҳофаза қилувчи орган, идора ва ташкилотларга 13 тақдимнома киритилиб, 25 сўровнома ва 3 огоҳлантирув хати юборилди.

Агентлик томонидан ўтказилган таҳлил натижалари бўйича вазирлик ва идораларга 51 тақдимнома киритилиб, 170 сўровнома ва 7 огоҳлантирув жўнатилган.

Агентликнинг сўровномалари бўйича прокуратура органлари томонидан жами 21 жиноят иши қўзғатилган.

Жисмоний ва юридик шахслардан агентликка 2380 мурожаат тушган. 909 таси бевосита агентлик ходимлари томонидан кўриб чиқилган. 1471 таси тааллуқлилиги бўйича юборилган. 52 таси аноним деб топилган. 156 таси бўйича мурожаатда кўрсатилган важлар ижобий ҳал этилган.

Давлат харидлари ва бошқа соҳаларда ўтказилган ўрганишлар натижалари бўйича жами 90,5 миллиард сўмлик 2 минг 808 ҳолатда молиявий хато ва камчиликларга йўл қўйилгани аниқланган.

Бу рақамлар Коррупцияга қарши курашиш агентлиги ҳузуридаги Жамоатчилик кенгашининг агентлик ҳисоботини эшитишга бағишланган йиғилишида қайд этилди.

Агентлик директори Акмал Бурҳонов 2020-2021 йиллардаги фаолияти юзасидан ахборот берар экан, 7 норматив-ҳуқуқий ҳужжат лойиҳаси тайёрланганини таъкидлади.

2021-2025 йилларга мўлжалланган Коррупцияга қарши курашиш миллий стратегияси лойиҳасини тайёрлаш учун ишчи гуруҳлар ташкил этилди. Улар томонидан хорижий тажриба, миллий қонунчилик ҳамда таҳлиллар асосида стратегиянинг дастлабки лойиҳаси тайёрланди.

«Коррупциясиз соҳа» лойиҳасини амалга ошириш юзасидан давлат харидлари ва соғлиқни сақлаш соҳаларида «Йўл харита»лари ишлаб чиқилган. Ижроси доирасида коррупциянинг олдини олишга қаратилган тарғибот ишлари амалга оширилган. Коррупция ҳолатлари бўйича фуқароларнинг шикояти учун «1203» қисқа рақами жорий этилган.

Ҳисоб палатаси билан биргаликда яширин иқтисодиётни қисқартириш ҳамда коррупцияга қарши «комплаенс-назорат» тизимини жорий этиш юзасидан 26 вазирлик ва идорада «йўл харита»лари назорат қилиб борилмоқда.

Қурилиш, Олий ва ўрта махсус таълим, Молия, Транспорт, Халқ таълими, Ахборот технологиялари ва коммуникацияларини ривожлантириш, Уй-жой коммунал хизмат кўрсатиш вазирликлари ҳамда Марказий банкда ҳам «комплаенс-назорат» тизими жорий этилмоқда.

Бугунги кунда 5 вазирлик ва идорада «комплаенс-назорат» жорий этиш якунланган ва улар «Коррупцияга қарши курашиш менежмент тизими» бўйича ISO 37001:2016 халқаро стандарт сертификатини қўлга киритган.

Агентликнинг ҳар ойлик фаолияти расмий веб-сайтда бериб борилмоқда. 6 маротаба матбуот анжумани ўтказилди. Агентлик ҳузурида «Журналист ва блогерлар» клуби ташкил этилди.

Агентлик ишлар самарасини ошириш учун халқаро ташкилотлар билан ҳамкорлик алоқаларини йўлга қўйган. Йиғилишда жамиятда коррупцияга нисбатан муросасизлик муҳитини яратиш учун қилинаётган тарғибот тадбирлари, келгусидаги режалар бўйича ҳам маълумот берилди.

Норгул Абдураимова, ЎзА