Озодлик, бу – шунчаки тўрт девор ортидаги маконни тарк этиш эмас. Бу — юракдаги оғир тошдан халос бўлиш, ҳаётнинг янада нурли кунларига ишонч билан қадам қўйишдир. Афв – имконият ва ишонч саналади.

Юртимизда инсон қадрини улуғлаш сиёсатининг яна бир ифодаси сифатида 2025 йил 6 декабрда Ўзбекистон Республикаси Президенти томонидан “Жазо муддатини ўтаётган, қилмишига чин кўнгилдан пушаймон бўлган ва тузалиш йўлига қатъий ўтган бир гуруҳ шахсларни афв этиш тўғрисида“ги фармон имзоланди. Бу — хато қилган, лекин юрагида пушаймонлик чироғини ёқиб, тўғри йўл сари интилган инсонлар учун яна бир умид бўлди.

Фармонга кўра, Ўзбекистон Республикаси Конституциясининг 109-моддаси 23-банди ва Жиноят кодексининг 76-моддаси асосида озодликдан маҳрум этилган Тошкент вилояти Зангиота туманида яшовчи Хўжаакбар Негматов ҳам муддатидан аввал шартли равишда озод этилди. Унинг ҳаётидаги бугунги кун — бир даврнинг якунланиши ва янги саҳифанинг очилиши бўлди.

Унинг озодликка чиқиш жараёнида Зангиота тумани ички ишлар бўлими ходимлари ҳамда Ўрта маҳалласи еттилиги аъзолари иштирок этди. Улар афв этилган юртдошимиз билан ўзаро суҳбатда энг аввало, ҳаётга янгича назар, ҳалол меҳнат ва жамиятга қайта қўшилиш масалаларига урғу берди.

Айни жараён шунчаки ҳужжат расмийлаштириш эмас, инсон тақдиридаги бурилиш нуқтасидир. Зеро, қўллаб-қувватланган ҳар бир қадам уни эртанги кунга, ёруғ келажакка янада яқинлаштиради.

<iframe width="650" height="420" src="https://www.youtube.com/embed/ufRtDsNTWjc" title="Afv farmoni yana bir adashgan insonga umid baxsh etdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Ҳамроз Баянов, ЎзА