Президент фармони – амалда

Тўғри йўлдан адашиб, хатога йўл қўйган, бугун эса қилмишига чин кўнгилдан пушаймон бўлган 9 нафар юртдошимиз Бухородаги жазони ижро этиш муассасаларида жазони ўтаётган эди. Президентимиз фармони асосида улар Конституциямиз қабул қилинганининг 31 йиллик байрамини ўз оиласи бағрида нишонлайдиган бўлди.

Бугун янгиланган Конституция том маънода инсон манфаатларини ҳимоя қиладиган халқчил ҳужжатга айланди. У мамлакат фуқароларининг қадр-қиммати, шаъни, ҳурматини белгиловчи, кишиларнинг жамият ҳаётида ўз ўрнини топишига кўмаклашувчи маёқ вазифасини ўтамоқда. Конституция байрамини наманганлик Ҳожиакбар Исмоилов ўз оиласи бағрида нишонлайдиган бўлди. Бу йил 20 ёшга қадам қўяётган ўғлон ёлғиз онанинг ишонган тоғи эди. Аммо биргина хато уни панжара ортига етаклади. Бугун қилмишидан пушаймон бўлаётган Ҳожиакбар муддатидан икки йил аввал яна озод ҳаётга қайтмоқда.

–Қилган жиноятимдан чин дилдан пушаймонман, –дейди Ҳожиакбар Исмоилов. –Келгусида бунақа жиноятларга қўл урмайман. Отам вафот этган. Озодликка чиққандан кейин онамнинг хизматини қиламан. Онамга жуда ҳам кўп азоб бердим. Шуни тушуниб етдим. Президентимизга раҳмат, муддатидан 2 йил олдин афв этдилар.  

Дилмурод Дадахонов гиёҳванд моддалар савдосига аралашиб қолди-ю боши деворга теккач, ўз хатосини англаб етди. Ёш оилада унинг ортидан норасидалари чирқираб қолди. 8 йилдан сўнг оила бағрига қайтганда унинг ўғиллари каттагина йигит бўлган бўларди. Аммо давлат раҳбарининг фармони асосида у юртдаги инсонпарварлик сиёсатини юракдан ҳис қилди.  

Бугун Сурхондарёнинг Олтинсойида эрка фарзанд бўлиб юрган Фарҳод Шоймардонов яқинларининг қувончи ичига сиғмайди. Турли оқимлар таъсирида панжара ортига тушган йигит ҳам хатоларини зулмат ортида тушуниб етди. У тинчликнинг, озодликнинг қадри ҳар недан устун эканини англаши учун эса орадан қанча сувлар оқиб ўтди.

–Байрамларда бизни жуда ҳам хурсанд қилган Президентимизга раҳмат, –дейди Фарҳоднинг онаси Роҳила Шерматова. –Ўғлимни кечаю-кундуз ўйлардим. Қандай аҳволда, қандай шароитда экан, деган саволлар мени қийнарди. Давлат раҳбарининг фармони билан ўғлим муддатидан илгари авф этилди. Жуда ҳам хурсандман.  

Аслида осойишта кунларнинг қадрига етиш учун хатога йўл қўйишга ҳожат йўқ. Аммо зулматни бошидан кечирган инсоннинг ёруғ кунларга эътиқоди тобора юксалади. Бугун тузалиш йўлига ўтган бу юртдошларимизнинг борар манзили янада мунаввар бўлишига шубҳа йўқ.

Зариф Комилов, ЎзА мухбири