Маълумки, айрим ҳайвонларнинг шох ва суяклари дунё бозорида харидоргир хомашё ҳисобланади. Шу сабаб, бунинг ортидан мўмай даромад орттиришни кўзлаган айрим шахслар табиатга зарар етказиш билан бирга, божхона тартиб қоидаларини бузишга уринади.

«Ғишткўприк» чегара божхона пости орқали ҳаракатланиб, хориж давлатидан юртимизга кириб келган фуқаро бошқарувидаги “Кобальт” русумли автотранспорт воситаси божхона кўригидан ўтказилди. Натижада автоулов ўриндиғининг ост қисмига яширинча жойланган, йўловчи божхона декларациясида кўрсатилмаган, ҳеч қандай ҳужжатлари бўлмаган, умумий қиймати 32 000 000 сўмлик, 180 дона буғу шохлари ва 1 дона фил тиши борлиги аниқланди.  

Маълумот учун, филнинг барча турлари ва унинг тана аъзолари халқаро табиатни муҳофаза қилиш иттифоқи Қизил рўйхатига киритилган.  

Ҳозирда ҳолат юзасидан текширув ҳаракатлари олиб борилмоқда.  

ЎзА