Ўмон Султонлигида чоп этиладиган «Asdaa Oman» газетасида эълон қилинган “Ўзбекистонда Aфғонистон бўйича халқаро конференция бўлиб ўтди” сарлавҳали мақолада анжуманда 100 га яқин хорижий делегация таркибида Марказий ва Жанубий Осиё, Европа ва Aмерика, Яқин Шарқ, Осиё ва Тинч океани минтақасининг 20 дан зиёд давлати вакили қатнашгани қайд этилган.

Ўзбекистон Президенти Шавкат Мирзиёев тадбир қатнашчиларига йўллаган мурожаатида Афғонистон иқтисодиётини қайта тиклаш асосий устувор йўналиш бўлиши кераклигини, бу мустаҳкам тинчликка эришишнинг муҳим шарти эканини таъкидлагани ҳам муаллиф эътиборидан четда қолмаган. Газетада мазкур мурожаатда қайта қуриш “Aфғонистоннинг минтақалараро иқтисодий жараёнга интеграциялашуви, инфратузилмавий ва ижтимоий аҳамиятга эга лойиҳаларни амалга оширишни ўз ичига олиши” ҳам алоҳида таъкидланган.

Шунингдек, тадбир якунида қабул қилинган мезбон давлат баёнотида ушбу конференция 2018 ва 2021 йиллари Тошкентда Aфғонистонда тинчлик жараёни, хавфсизлик соҳасидаги ҳамкорлик ва минтақавий коммуникация масалаларига бағишлаб ўтказилган икки нуфузли анжуманнинг давоми бўлгани қайд этилгани ҳам қаламга олган.

“Якуний ҳужжатда таъкидланишича, Aфғонистон бўйича биринчи вакиллик халқаро форуми “сиёсий баёнот билан чекланиб қолмай, халқаро ҳамжамият эътиборини бутун афғон халқи билан бирга қўшни давлатлар манфаати учун ҳам тинчлик, барқарорлик ва давлатнинг иқтисодий тикланишига кўмаклашиш масалаларига қаратилган", дея хулоса қилади «Asdaa Oman».

Г.Сатторова, ЎзА