Афғонистондан собиқ иттифоқ ҳарбий қўшинларининг олиб чиқилганлигининг 33 йиллиги муносабати билан Андижон вилоятининг барча туман ва шаҳарларида тантанали тадбирлар ўтказилди.

Ўзбекистондан афғон урушида 64 минг 500 аскар иштирок этиб, улардан 1 минг 522 нафари ҳалок бўлган. Биргина Андижон вилоятидан Афғонистондаги ҳарбий ҳаракатларда 5 минг 300 нафар йигит қатнашган. Улар жангларда мардлик, жасорат намуналарини кўрсатиб, аксарияти турли медаль ва орденлар билан тақдирланган. Жанглардан 673 нафар йигит ногирон бўлиб қайтган бўлса, 152 нафарига она юртга тирик қайтиш насиб этмаган.

Халқимиз ана шу мард ва жасур ўғлонлари хотирасини асло унутмайди. Андижон туманида бўлиб ўтган «Халқимизнинг мард ва жасур ўғлонлари» деб номланган тадбир иштирокчилари туман марказидаги Хотира майдонига гулчамбарлар қўйди. Тадбирда ветеран жангчи-фахрийларга, ногиронларга юксак эҳтиром кўрсатилди. Балиқчи туманида тарихий санага бағишлаб ташкил этилган тадбирга тумандаги байналмилалчи жангчилар таклиф этилди. Тадбирда туман ҳокими Жасурбек Абдурайимов иштирок этиб, уларни муборакбод этди.

Ўтказилган барча тадбирларда байрам дастурхони ёзилди, бадиий дастур намойиш этилиб, байналмилалчи жангчиларга совға-саломлар улашилди.

Ф. УБАЙДУЛЛАЕВ, З. УМРЗОҚОВ (сурат), ЎзА