Адлия вазирлигининг "Адлия билан мулоқот" (https://www.facebook.com/groups/adliya/) гуруҳида "Тадбиркорлик ва шаҳарсозлик фаолиятини амалга ошириш учун бўш турган ер участкаларини бериш тартиб-таомиллари" мавзуида онлайн мулоқот ўтказилди.

Мулоқотда Адлия вазирлигининг ижтимоий-иқтисодий соҳада ҳуқуқни қўллаш амалиётини ўрганиш бошқармаси ходимлари иштирок этиб, тадбиркорлик ва шаҳарсозлик фаолиятини амалга ошириш учун бўш турган ер участкаларини "YERELEKTRON" ААТга жойлаштириш, онлайн аукционда жисмоний ва юридик шахсларнинг иштирок этиш шартлари ва тартиби бўйича тушунтириш берди.

Жумладан, қишлоқ хўжалигига мўлжалланмаган бўш турган ер участкалари тадбиркорлик ва шаҳарсозлик фаолиятини амалга ошириш учун доимий фойдаланишга берилади. Ер участкасини танлаш материаллари бўйича келишиш ва хулосалар бериш фақат “YERELEKTRON” ААТ орқали амалга оширилади. Аукцион натижалари тўғрисидаги баённома олди-сотди шартномаси кучига эга бўлиб, ушбу ер участкасидан доимий фойдаланиш ҳуқуқини аукцион ғолиби номига давлат рўйхатидан ўтказиш учун асос ҳисобланади.

Тадбиркорларга ҳозирда онлайн аукцион иштирокчисига айланиш тартиби жуда осон бўлиб, бунинг учун www.e-auksion.uz сайтидан рўйхатдан ўтиш, ўзларини қизиқтирган объект (ЛОТ)ни танлаши ва ариза бериши, сўнгра тўловларни тижорат банклари ёки электрон тўлов тизимлари (Payme, Click ва бошқалар) орқали амалга ошириб, реал вақт режимида онлайн-аукционда иштирок этиш имкониятига эга бўлиши мумкин.

Маълумот учун: Жорий йилнинг 1 сентябрь ҳолатига кўра, 10 минг 908 ер участкаси аукцион савдоларига чиқарилган. Шундан 4 мингдан зиёди сотилган. Қолгани аукцион жараёнида муҳокамада.

Мулоқот давомида фуқароларнинг аукционда иштирок этиш тартиби ва шартлари, аукционда ютиб олинган ер участкасининг қийматини тўлаш ва мавзуга оид бошқа саволларга вазирлик ходимлари томонидан ҳуқуқий тушунтириш берилди.

Тушган мурожаатларнинг аксарияти ўрганиш талаб этганлиги учун алоҳида назоратга олинди ва жойига чиқиб ўрганиш учун ҳудудий адлия органларига юборилди. Мурожаатларнинг натижалари оммавий ахборот воситалари орқали маълум қилинади.