Ўзбекистон Республикаси Президентининг жорий йил 4 декабрдаги афв этиш тўғрисидаги фармонига асосан Жиззах вилоятида ҳам озодликка чиқарилган фуқароларни жамиятга мослаштириш чоралари кўрилаётир.

Ушбу фармон билан Фориш тумани, Оқтом маҳалласида истиқомат қилувчи Сардор Шукуров озодликка чиқди. Муқаддам у ёшлик қилиб, ёт, диний оқимлар таъсирига тушиб қолган эди.

Анча вақт озодликдан маҳрум бўлган одамнинг жамиятга бирданига маослашиб кетиши осон кечмаслиги маълум. Озодликка чиққан фуқаронинг жамиятга қайта мослашиб кетиши учун шароит, вақт керак бўлади.

 Собиқ маҳкумнинг жамиятга мослашувида яқинлари, атрофидагилар, маҳалла аҳли уни қандай қабул қилиши, муаммоларини ҳал этишда кўрсатиладиган ёрдамнинг аҳамияти катта. Сардор ҳам маҳалласининг, маҳаллий хокимликнинг эътиборидан четда қолмади.

Унинг хонадонига ҳокимлик ҳамда маҳалла вакиллари келиб, яшаш шароити, эҳтиёжи, истаги билан танишдилар. Бундай пайтда бириннчи навбатда иш билан таъминлаш масаласини ҳал этиш керак.  

Шунинг учун Сардор Шукуровга оиласи билан унга 1 гектар ер олиб деҳқончилик қилиш таклиф этилди. Ишни бошлашида банк имтиёзли кредити олиб кўмак бериладиган бўлди.

– Давлатимизнинг инсонпарварлигидан, халқимизнинг бағрикенглигидан, маҳаллам, яқинларим кўрсатаётган ғамҳўрликдан беҳад мамнунман, – с. Шукуров. – Бу яхшиликларни яхшилик билан қайтариш учун ҳаракат қиламан. Эл-юртимизнинг эзгу ишларига камарбаста бўлиб меҳнат қиламан.  

Адашиш айб эмас, муҳими тўғри йўлга тушиб олиш. Билиб-билмай жиноят қилган, энди  ўз қилмишидан астойдил пушаймон фуқаронинг жамиятга қайта мослашувида унга кўмаклашиш, қўллаб-қувватлаш жуда муҳим.  

Т. БЕКНАЗАРОВ, ЎзА