Өзбекстан Республикасының Инвестициялар, индустрия және сауда министрі Лазиз Қудратов «ACWA Power» компаниясының басқарма төрағасы Мухаммад Абунаянмен келіссөздер жүргізді.

Министрлік мәліметінше, тараптар компанияның еліміздегі ағымдағы жобаларының жай-күйін, энергетика және химия өнеркәсібіндегі инвестициялық ынтымақтастықты одан әрі кеңейту перспективаларын талқылады.

«Кездесуде шетелдік кәсіпорынның республиканың энергетика саласын дамытуға қосқан елеулі үлесі атап өтілді. Бүгінгі таңда компанияның Өзбекстандағы инвестициялық портфелі жалпы құны 6,8 миллиард доллардан асатын және жалпы қуаттылығы 5,5 ГВт-тан асатын 8 жобадан тұрады. Компания қызметі Өзбекстанды қолайлы инвестициялық бағыт және Орталық Азия аймағында жаңартылатын энергия көздерін енгізудің жетекші орталығы ретінде ілгерілетуде», делінген хабарламада.

Сондай-ақ, Сырдарияда қуаты 1,5 ГВт бу-газ электр станциясы, Бұхара облысы мен Қарақалпақстан Республикасында жалпы қуаты 2,6 ГВт жел электр станциялары және Самарқанд және Ташкент облыстарындағы қуаты 1,4 ГВт күн электр станциялары салу жобаларын жүзеге асыруға байланысты мәселелер бойынша конструктивті пікір алмасылып, жобаларды жедел іске қосуды қамтамасыз ету үшін практикалық шаралар кешенін қабылдау келісілгені айтылған.

Осылайша, тараптар қажетті процестің аяқталуын және қуаттылығы жылына 3000 тонна сутегі өндіретін «жасыл» зауыттың құрылыс жобасы бойынша жаңа келісімнің жасалуын құптады. Құрылыс жұмыстары биыл күзде басталады.

Келіссөздер соңында талқыланған жобалар мен бастамаларды уақтылы және табысты жүзеге асыру аясында мақсатты шаралар қабылдау келісілді.