Бугун, “Жаҳон Медиа конгресси” доирасида “16 ноябрь – Халқаро бағрикенглик куни”га бағишланган конференция бўлиб ўтди. Тадбирда Бирлашган Араб Амирликлари ҳукумати аъзолари, қатор хорижий ташкилотлар вакиллари, оммавий ахборот воситалари ходимлари иштирок этди.

Анжумандан кўзланган асосий мақсад – миллатлараро тотувлик ва диний бағрикенгликни таъминлаш борасида амалга оширилган ишларни ўрганиш, истиқболдаги вазифаларни таҳлил қилиш, мавжуд муаммоларни аниқлаш, ўз ечимини кутаётган масалаларни ҳал этиш бўйича таклифлар ишлаб чиқишдан иборат бўлди.

Бағрикенглик бўйича давлат вазири Шайх Наҳаён бин Муборак Ол Наҳаённинг маърузаси тинглангач, конференция оммавий ахборот воситаларининг ўрни тўғрисидаги махсус панель муҳокамалар шаклида давом этди.  

Амирликлар ахборот агентлиги – WАМ ҳамкорлигида бағрикенглик кампанияси фаолияти йўлга қўйилгани маълум бўлди. Бу БАА заминида бағрикенгликнинг турли кўринишлари – диний, маданий, этник ва шу каби жиҳатларини ёритишда ёрдам беради.

Ноябрь ойининг биринчи икки ҳафтасида мақолалар чоп этилган. Ушбу ҳаракатлар “Жаҳон медиа конгресси”даги анжуман билан якунланди. Тадбир бошланишида ёзилган мақолалар хусусида қисқача ҳужжатли фильм ҳам намойиш қилинди.  

Шундан сўнг “Бағрикенглик жамиятини ташкил қилишда оммавий ахборот воситаларининг роли” мавзусида давра суҳбати қизғин муҳокамага бой ўтди.  

Якунда иштирокчиларнинг суратга тушиш маросими бўлиб ўтди.

Конгресс давом этмоқда, ЎзАни кузатиб боринг.

<iframe width="713" height="401" src="https://www.youtube.com/embed/PIwdFmEmTiI" title="" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>

Б.Худойбердиев,

Ё.Мелибоев, Н.Мардонов (видео),

ЎзА

Абу-Даби шаҳри