Ватанимиз довруғини дунёга достон этиб келаётган спортчиларни камолга етказишда пойтахтимизда жойлашган Республика олимпия ва паралимпия спорт турлари марказининг алоҳида ўрни бор.

Ушбу маскан кейинги йилларда янада янгича қиёфага кирди. Ўтган 4-5 йиллик муддатда марказда бири-биридан кўркам бир қатор замонавий спорт майдонлари, яккакураш, сув спорт турлари, ўйин турларига ихтисослашган замонавий мажмуалар бунёд этилди. Мавжудлари қайта таъмирланди.

Мамлакатимизда спорт ҳаракатини янги босқичга олиб чиқиш борасидаги кенг миқёсли ислоҳотлар натижасида Республика олимпия ва паралимпия спорт турлари марказида натижалар, кўрсаткичлар яхшиланди.

Рақамларга эътибор қаратадиган бўлсак, Ўзбекистон чемпионатлари, биринчиликларидаги муросасиз курашлар туфайли 251 нафар марказ спортчиси олимпия спорт турлари бўйича миллий терма жамоаларнинг асосий, 76 нафари захира таркибидан жой олишга муваффақ бўлди.

Ортда қолган 2025 йил давомида марказ спортчилари халқаро майдонда ташкил этилган комплекс спорт ўйинлари, жаҳон ва қитъа чемпионатларида ғолиблик шоҳсупасига кўтарилдики, бу, ўзбек спортининг келгуси муваффақиятларига мустаҳкам пойдевор қўйилаётганидан далолат, дейиш мумкин.

Эътибор, қўллов ва рағбат ёшларни ҳамиша муваффақиятлар сари бошлаб келган. Ўтган йили Озарбайжонда кечган МДҲ ўйинларида марказ ёшлари 9 та олтин, 3 та кумуш, 6 та бронза, Баҳрайнда ташкил этилган ёшлар Осиё ўйинларида 6 та олтин, 3 та кумуш, 4 та бронза медалини қўлга киритган. Шунингдек, Осиё миқёсидаги нуфузли мусобақаларда 40 та олтин, 23 та кумуш, 18 та бронза, жаҳон мақомидаги чемпионат ва турнирларда 15 та олтин, 4 та кумуш, 5 та бронза медалига эгалик қилди.

Республика олимпия ва паралимпия спорт турлари маркази директори Аброр Мамадалиев билан ўтказган суҳбатимиз ушбу ютуқларнинг аҳамияти, марказ спортчиларини жорий йилги спорт мавсумида кутиб турган нуфузли турнирлар, чемпионатлар, марказда жорий йил давомида ўтказиладиган мусобақалар ҳақида бўлди.

<iframe width="640" height="420" src="https://www.youtube.com/embed/Sa1F1l9-Cdw" title="Abror Mamadaliyev: “Sportda yangi infratuzilma yangi g‘alabalarni ta’minlaydi”" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Тўлқин Рўзиев,

Дониёр Ёқубов (видео), Анвархўжа Аҳмедов (монтаж), ЎзА