“Kyodo News” хабар беришича, Япониянинг собиқ Бош вазири Синзо Абэнинг қотили Тэцуя Ямагами ўзига нисбатан эълон қилинган ҳукмга қарши апелляция берди.

Абэ 2022 йил 8 июль куни Нара музофотидаги сайлов олди тадбирида нутқ сўзлаётганда отиб ўлдирилган. Тэцуя хонаки усулда ясалган қурол билан Абэнинг орқасидан икки ўқ узган. Яраланган сиёсатчи бир неча соатдан кейин қон йўқотилишидан вафот этган.

21 январь куни қотиллик содир бўлган туман суди Ямагамига умрбод қамоқ жазоси берди. Ҳимоя гуруҳи бугун Осака Олий судига апелляция шикояти киритган. 20 йилгача қамоқ жазоси сўраётган адвокатлар судланувчининг болалиги Абэ билан алоқадорлиги тахмин қилинган диний ташкилот – “Бирлашиш черкови” туфайли қийин кечгани қотиллик учун асос ва билвосита сабаб бўлганини таъкидламоқда.

Айблов томони айни далилларни мантиқсиз, деб рад этди ва жиноят 41 ёшда содир этилгани, бу эса судланувчига вазиятни холисона баҳолаш имконини беришини таъкидлади. Суд умрбод қамоқ жазоси сўраган прокуратуранинг барча далилларини қабул қилди ва ҳукмда орқадан икки ўқ узиш “қўрқоқлик ва ёвуз ҳаракат экани”га урғу берди.

Ҳукм чиқариш учун 31 ўрин ажратилди, 685 ариза йиғилди. Ўриндиқлар суддан бир неча соат олдин лотерея усулида тақсимланди.

Қотилнинг ўзи ҳам жиноят сабаби сифатида “Бирлашиш черкови” билан алоқани келтирди. Тэцуянинг онаси аъзо мақомида ташкилотга кўп миқдорда хайрия қилган: уйини сотган, оиласини вайрон қилган ва болаларини қашшоқликка дучор қилган. Ямагами дўстона тузилма сифатида мазкур ташкилотга салом юборгани учун Синзони “Черков” билан алоқадор, деб ҳисоблаган. Жамоа масъуллари эса собиқ Бош вазир билан бирор боғлиқликни инкор этди, чунки Абэ аъзо сифатида рўйхатга олинмаган, тузилмага хайрия ҳам қилмаган.

Барибир, шов-шувли қотиллик сиёсатчиларнинг баҳсли диний ташкилот билан эҳтимолий алоқалари юзасидан тергов тўлқинини юзага чиқарди. Абэ аъзо бўлган ҳукмрон Либерал демократик партиядан бир неча ўнлаб сиёсатчи “Бирлашиш черкови” билан у ёки бу тарзда боғлиқлиги аниқланди. Қолаверса, мазҳаблараро оилалар фарзандлари қашшоқликда яшаши, ташкилот буйруғи билан мажбуран турмушга чиқиши каби турли фактлар, кўрсатмалар пайдо бўлди.

Шундан сўнг диний ташкилотларни назорат қилувчи Таълим ва маданият вазирлиги “Бирлашиш черкови” фаолиятини текшира бошлади. Натижада жами қурбонлар сони 1500 дан ошган, деган хулосага келди. 2025 йил март ойида ушбу ташкилотни тугатиш тўғрисида фармон чиқарилди.

Судлар ҳозир мазҳабпарастларнинг фарзандларидан камида икки жамоавий даъво аризасини кўриб чиқмоқда. Яна бир неча даъво тегишли идораларга киритишга тайёрланмоқда.

Гўзал Сатторова, ЎзА