Америка Қўшма Штатларида ўтказилган “Freestyle Chess Grand Slam Las Vegas” турнирининг тўрт кунлик шиддатли беллашувлари якунланди.

Дунёнинг энг кучли 16 нафар гроссмейстери қаторида мазкур турнирда дона сурган ҳамюртларимиз Нодирбек Абдусатторов ва Жавоҳир Синдоров жаҳон шахмат ишқибозларига яна бир бор ўз иқтидорларини намойиш этди.

Бири-биридан қизиқарли кечган 64 катакдаги тафаккур жанглари сарҳисобига кўра, АҚШ шарафини ҳимоя қилаётган тажрибали шахматчи Левон Аронян турнир давомида ишончли ўйин кўрсатиб, чемпионликни қўлга киритди. 2-ўрин чорак финалда Жавоҳир Синдоровни кичик ҳисобда доғда қолдирган америкалик Ҳанс Ниеманнга насиб этди.

Турнирга ўзига хос кайфият ва руҳий кўтаринкилик бағишлаб, унутилмас комбинацияларни тақдим этган Магнус Карлсен 3-ўрин соҳиби бўлди.

Маҳоратли шахматчиларимиз Нодирбек Абдусатторов ва Жавоҳир Синдоров германиялик Винcент Каймер, АҚШ вакили Леиниер Домингуез қаторида Лас-Вегас турнирини 9–12-ўринларда якунлади ва мусобақа низомига мувофиқ 10 минг АҚШ доллари билан тақдирланди.

Турнирда 1-ўринни эгаллаган Левон Аронян 200 минг АҚШ долларига эга чиққан вазиятда 2-ўрин соҳиби Ҳанс Ниеманн 140 минг, 3-ўрин эгаси Магнус Карлсен 100 минг, 4 ва 5-ўринларга эга чиққанлар 60 ва 50 минг АҚШ долларини қўлга киритди. Шунингдек, 6-8 ўринлардан жой олган шахматчилар ҳам тегишли пул мукофотларига сазовор бўлди. 13-16-ўрин эгалари эса 7,5 минг АҚШ долларига лойиқ кўрилди.

Тўлқин Рўзиев,

ЎзА