Чехиянинг Прага шаҳрида ўтаётган “Prague International Chess Festival 2026” халқаро турнири “Masters” гуруҳининг ортда қолган 2-тур ўйинларидан сўнг ҳамюртларимиз Нодирбек Абдусатторов ва Нодирбек Ёқуббоев турнир жадвалида пешқадамлик қилмоқда.

Кеча ўтказилган 2-тур баҳсларида шахматчиларимиз номдор рақибларига қарши қора доналарда ҳаракат қилди.

Нодирбек Абдусатторов эронлик Пархам Магсудлу билан 48-юриш ҳолатида, Нодирбек Ёқуббоев эса амалдаги жаҳон чемпиони, ҳиндистонлик Гукеш Доммараджу билан 30-юриш ҳолатида дурангга имзо чекди.

Шунингдек, 1-турда Ёқуббоевга имкониятни бой берган испаниялик Дэвид Антон ушбу турда нидерландиялик Жорден ван Форестни, Абдусатторовга илк турда ютқазган ҳиндистонлик Аравиндх Читамбарам эса америкалик Ханс Ниманнни мағлубиятга учратди.

Бугун, 27 февраль куни ўтказиладиган 3-тур баҳсида Нодирбек Абдусатторов оқ доналарда германиялик Винсент Кеймер, Нодирбек Ёқуббоев эса америкалик Ханс Ниманн билан куч синашади.

Шу ўринда айтиш лозимки, бугунги Н.Абдусатторов – Кеймер “жанги” қайсидир маънода жаҳон рейтингининг тўртинчи поғонаси учун кураш кўринишини олиши билан ҳам аҳамиятлидир.

Турнирнинг сўнгги, 9-тур ўйинлари 6 март куни бўлиб ўтади.

Т. Рўзиев, ЎзА