Cербияда шахмат бўйича клублар ўртасида ўтказилаётган Европа кубогининг ортда қолган 4-турида кутилмаганда Нодирбек Абдусатторов ва Жавоҳир Синдоров жамоаси мағлубиятга учради.

Кеча ўтган 4-турда Нодирбек Абдусатторов “Турк авиалинияси” жамоаси  аъзоси эронлик Парҳам Мақсудлуни таслим этган, Синдоров рақиби Эдиз Гурел билан дуранг ўйнаган бўлса-да, "SuperChess" ғалабага эриша олмади.  

Ҳамюртларимизнинг жамоадошлари бўлган ҳиндистонлик Гукеш ва Праггнанандха имкониятни бой бериб қўйди.

Баҳслар сарҳисобига кўра, Македониянинг "Alkaloid" жамоаси етакчига айланди. “Турк авиалинияси” жамоаси 2-ўринга кўтарилиб олди.  

Мазкур мусобақада Словениянинг "TAJFUN-ŠK Ljubljana" жамоаси шарафини ҳимоя қилаётган яна бир ёш гроссмейстеримиз Нодирбек Ёқуббоев кеча "Alkaloid" билан бўлган ўйинда дунёнинг саккизинчи рақамли шахматчиси хитойлик Вей Йини мағлубиятга учратди.        

5-тур остонасида "SuperChess" ва "TAJFUN-ŠK Ljubljana" жамоалари 6 очко тўплаган ҳолда турнир жадвалининг 7 ва 8-ўринларини банд этган.

Бугун ўтадиган 5-турда "SuperChess" жамоаси Сербиянинг "SK JAVES Modra" жамоаси билан, "TAJFUN-ŠK Ljubljana" клуби эса Черногориянинг "Elektroprivreda" жамоаси билан куч синашади.

Эслатиб ўтамиз, 27 октябрга қадар давом этадиган Европа кубоги баҳсларида 84 та эркаклар жамоаси дона сурмоқда.

Т.Рўзиев,

ЎзА