Бугун, 4 декабрь куни Лондондаги “Emirates Stadium” мажмуасида давом этаётган “XTX Markets London Chess Classic" турнирининг 8-турида Нодирбек Абдусатторов қора доналарда франциялик Алиреза Фирузжа билан куч синашади.

Мукофот жамғармаси 50 минг фунт стерлингдан иборат мазкур турнирда Абдусатторовнинг 1-ўринни эгаллаши ФИДЕ рейтингида ТОП-10 ликка қайтиши масаласида муҳим саналади.

Айтиш лозим, декабрь ойи учун эълон қилинган ФИДЕ рейтингида ҳозирда норвегиялик Магнус Карлсен етакчилик қилаётган бўлса, Хикару Накамура (АҚШ), Фабиано Каруана (АҚШ), Винцент Кеймер (Германия), Аржун Эригайси (Ҳиндистон), Алериза Фирузжа (Франция), Рамешбабу Прагнанандха (Ҳиндистон) ва Аниш Гири (Нидерландия) ТОП-10 ликдан жой эгаллади.

Ҳиндистонда ўтган ФИДE жаҳон кубогидаги натижаси орқали Нодирбек Абдусатторов 18,4 очко йўқотган эди. “XTX Markets London Chess Classic" турниридаги кетма-кет 6 ғалабасидан сўнг рейтингини 19.8 очкога яхшилашга муваффақ бўлди. Агар ҳамюртимиз бугун Фирузжани мағлуб этса ва муддатидан аввал Лондон мусобақасининг ғолиблигига эришса, дунё рейтингида яна ТОП-10 ликка қўшилиши эҳтимолдан йироқ бўлмайди.

ФИДЕнинг декабрь ойи учун эълон қилган янгиланган рейтингида шахматчиларимиздан Жавоҳир Синдоров(2726) 22, Нодирбек Ёқуббоев (2691) 38,  Рустам Қосимжонов(2671), Шамсиддин Воҳидов (2641) 85-ўринни банд этди.

Шахматчи қизларимиздан Афрўза Ҳамдамова шахматчи аёллар рейтингида 41, Гулруҳбегим Тоҳиржонова эса 69-поғонага эгалик қилди.

Эслатиб ўтамиз, Н.Абдусатторов 6,5 очко билан етакчилик қилаётган “XTX Markets London Chess Classic" турнири 5 декабрга қадар давом этади.

Т.Рўзиев, ЎзА