Қатар пойтахти Доҳа шаҳрида аёллар ҳамда эркаклар ўртасида рапид ва блиц йўналишида FIDE жаҳон чемпионатининг ғолиб ва совриндорлари аниқланди.

Бугун, 30 декабрь куни 70 дан зиёд давлатнинг 394 нафар шахматчиси иштирок этган жаҳон чемпионатининг блиц йўналиши очиқ мусобақалари финалида ҳамюртимиз Нодирбек Абдусатторов ФИДЕ рейтинги пешқадами, собиқ жаҳон чемпиони Магнус Карлсен билан куч синашди.

Қизиқарли ва шиддатли кечган ўйинда 2.5-1.5 ҳисобида Карлсен устунликка эришди.

Нодирбек Абдусатторов блиц йўналиши бўйича 2025 йилги жаҳон чемпионатининг кумуш медалини қўлга киритди.

Аёллар ўртасида қозоғистонлик Бибисора Ассаубаева блиц йўналишида жаҳон чемпионлигини тантана қилди.

 Т. Рўзиев, ЎзА