Футбол бўйича Англия Лига кубогининг чорак финал босқичида “Манчестер Сити” ўз майдонида “Брентфорд” жамоасини қабул қилди. Учрашувда мезбонлар Райан Черки ва Савио томонидан киритилган голлар эвазига 2:0 ҳисобида ғалаба қозониб, ярим финалга йўл олди.
Биз учун аҳамиятли жиҳати, мазкур баҳсда ҳамюртимиз Абдуқодир Ҳусанов асосий таркибда майдонга тушиб, тўлиқ 90 дақиқа ҳаракат қилди. Учрашувнинг 16-дақиқасида Натан Акенинг хатосидан сўнг юзага келган хавфли вазиятда Ҳусанов Кевин Шадени тўхтатишга уринар экан, ўйин қоидасини бузди ва рақибнинг дарвозабон билан яккама-якка чиқиш имкониятига тўсқинлик қилди. Ҳакам ушбу вазиятда огоҳлантириш билан чекланди, бу эса “Брентфорд” футболчилари томонидан эътирозларга сабаб бўлди.
Ушбу учрашувдан сўнг бир қатор машҳур таҳлилий порталлар Абдуқодир Ҳусановнинг ўйинини турлича баҳолади. Жумладан, “Fotmob” портали ҳамюртимизнинг ҳаракатларини 7,8 баллга, “Sofascore” — 7,2 баллга, “Flashscore” эса 7,3 баллга лойиқ кўрди.
Статистик маълумотларга кўра, Абдуқодир Ҳусанов ўйин давомида тўп узатмаларининг 92 фоизини аниқ амалга оширган, 52 марта тўпга тегинган ҳамда рақиб майдонининг учинчи зонасига 2 марта пас берган. Ҳимояда у тўпни икки бор рақибдан олиб қўйган ва боши билан қайтарган, бир марта пасни кесиб, тозалаш ҳаракатини амалга оширган ҳамда 3 марта тўпни қайта қўлга киритган.
Жисмоний тайёргарлик ва тезкорлик жиҳатидан АПЛда ажралиб турувчи Ҳусанов ушбу баҳсда яккама-якка курашларда ҳам юқори кўрсаткичларни қайд этди. Хусусан, ердаги дуэлларнинг 75 фоизида, ҳаводаги курашларнинг эса 50 фоизида устун келди.
Шу тариқа, маълум муддат захирада қолган футболчимиз майдонга қайтиб, кутилганидек, ўзининг ишончли ўйинини намойиш этди.
Қайд этиш жоиз, Пеп Гвардиола 2016 йилдан буён “Манчестер Сити”ни кубок мусобақалари доирасида 13-маротаба ярим финалга олиб чиқди. Бу кўрсаткич Англия клублари орасида мутлақ рекорд ҳисобланади. “Шаҳарликлар” испаниялик мутахассис қўл остида Лига кубоги ярим финалига 2017/18, 2018/19, 2019/20 ва 2020/21 мавсумларида ҳам етиб борган.
Жавоҳир Тошхўжаев,
ЎзА