2025 йил якунланиши билан футбол оламидаги натижалар ва индивидуал кўрсаткичлар халқаро ташкилотлар ҳамда таҳлил марказлари томонидан чуқур ўрганилмоқда.

Жумладан, нуфузли “Manila Standard” нашри йил сарҳисоби асосида Осиё қитъасининг энг кучли беш нафар футболчисидан иборат рейтингни эълон қилди.

Ушбу рўйхатдан Ўзбекистон миллий терма жамоаси ва Англиянинг “Манчестер Сити” клуби ҳимоячиси Абдуқодир Ҳусанов ҳам ўрин олди. Манба унинг универсаллик, жисмоний тайёргарлик ва ўйинни ўқиш борасидаги юқори салоҳиятини алоҳида қайд этган.

Шунингдек, рейтингга Англиянинг “Брайтон” сафида тўп тепаётган япониялик вингер Каору Митома, Франциянинг “ПСЖ” клуби ярим ҳимоячиси Ли Кан Ин, Саудия Арабистонининг “Ал-Ҳилол” жамоаси етакчиси Салим Ад-Давсари ҳамда фаолиятини АҚШнинг “Лос-Анжелес” клубида давом эттираётган жанубий кореялик юлдуз Сон Хён Мин киритилди.

Нашрга кўра, ушбу футболчилар 2025 йил давомида клуб ва миллий жамоалар миқёсида барқарор ўйин намойиш этиб, қитъа футболида етакчи шахслар сифатида ажралиб турди.

Жавоҳир Тошхўжаев, ЎзА