“Transfermarkt” портали барча конфедерациялар бўйича футболчиларнинг трансфер қийматлари акс эттирилган навбатдаги рейтингни эълон қилди. Унда ҳар бир конфедерациядаги энг қиммат футболчилар саралаб олинган.

Биз учун аҳамиятлиси, ушбу рейтингда Осиё футбол конфедерациясининг (AFC) энг қиммат футболчиси сифатида “Манчестер Сити” клуби сафида муносиб ўйин кўрсатаётган ҳамюртимиз Абдуқодир Ҳусанов эътироф этилди.

21 ёшли футболчимизнинг бугунги кундаги трансфер қиймати 35 миллион еврони ташкил этмоқда. Шуни таъкидлаб ўтиш лозимки, бугунга қадар ўзбек футболи оламида бундай юқори кўрсаткични қайд этган футболчи бўлмаган. Шу боис ҳам Абдуқодир Ҳусановнинг бугунги кундаги кўрсаткичлари спортимиз тарихида олтин ҳарфлар билан ёзилмоқда.  

Қайд этиш жоиз, ушбу рўйхатда Абдуқодир Ҳусановдан кейин иккинчи ва учинчи ўринлардан япониялик футболчилар — Каору Митома ва Такефуса Кубо жой олган.

Шунингдек, Африка футбол конфедерацияси (CAF) бўйича марокашлик Ашраф Ҳакими (80 миллион евро), CONCACAF ҳудудида америкалик Кристиан Пулишич (60 миллион евро), Жанубий Америкада Винисиус Жуниор (150 миллион евро) энг қиммат футболчи сифатида қайд этилган. Европа (УЕФА) мамлакатлари орасида эса бирданига уч нафар футболчи — испаниялик Ламин Ямал, норвегиялик Эрлинг Ҳоланд ҳамда франциялик Килиан Мбаппе 200 миллион евро билан энг юқори трансфер қийматига эга ўйинчилар сифатида биринчи ўринни бўлишиб олган.

Жавоҳир Тошхўжаев, ЎзА