Ўзбекистон миллий терма жамоаси ҳимоячиси Абдуқодир Ҳусанов Англия футболида яна бир бор юксак эътирофга сазовор бўлди.

“Манчестер Сити” сафида тўп сураётган футболчимиз январь ойи давомида Англия Премьер-лигаси, мамлакат кубоги ва Европа Чемпионлар лигаси доирасидаги учрашувларда барқарор ҳамда ишончли ўйин намойиш этди. Унинг юқори савиядаги ҳаракатлари клуб томонидан ойнинг энг яхши футболчиси номинациясига илгари сурилишига асос бўлди.

Клуб расмий сайтида ўтказилган овоз бериш натижаларига кўра, Абдуқодир Ҳусанов жамоа дарвозабони Джанлуиджи Доннарумма ва ярим ҳимоячи Бернарду Силвани ортда қолдириб, январь ойининг энг яхши ўйинчиси деб топилди.

Қайд этиш жоиз, Ҳусанов ўтган йилнинг февраль ойида ҳам “Манчестер Сити” таркибида ойнинг энг яхши футболчиси сифатида эътироф этилган эди. Шу тариқа, у ўзбек футбол тарихида “Манчестер Сити” сафида икки марта ойнинг энг яхши ўйинчиси деб топилган илк футболчига айланди.

Мутахассислар фикрича, Абдуқодир Ҳусановнинг бу каби ютуқлари нафақат унинг шахсий маҳорати, балки ўзбек футболи нуфузининг халқаро майдонда юксалаётганидан ҳам далолат беради.

Жавоҳир Тошхўжаев, ЎзА