УЕФА матбуот хизмати эълон қилган Европа чемпионлар лигаси умумий гуруҳ босқичининг энг тезкор футболчиларининг кучли ўнлигида Ўзбекистон миллий терма жамоаси ва "Манчестер Сити" ҳимоячиси Абдуқодир Ҳусанов номи қайд этилди.

Эълон қилинган рўйхатга кўра, Франция терма жамоаси ҳамда "Реал" ҳужумчиси Килиан Мбаппе 34,9 км/с тезлик билан етакчиликни қўлга киритган бўлса, Ўзбек футбол мактаби тарбияланувчиси Абдуқодир Ҳусанов 34,7 км/с тезлик билан кучлилар рўйхатининг иккинчи поғонасини эгаллади.

Худди шунингдек, ушбу қатордан Португалия терма жамоаси аъзоси Карлос Форбс (Брюгге), Бразилия терма жамоаси аъзоси Андерсон Силва (Пафос), уругвайлик Федерико Вальверде (Реал) АҚШ вакили Рикардо Пепи (ПСВ), нидерландиялик футболчи Жереми Фримпонг (Ливерпуль) кабилар жой олишди.

Т. Рўзиев, ЎзА