Англиянинг Ливерпуль шаҳрида жойлашган “Bank Arena” мажмуасида бокс бўйича катталар ўртасида жаҳон чемпионатида Ўзбекистон терма жамоаси аъзолари ғолибона юришини давом эттирмоқда.

Мусобақанинг учинчи кунида Ўзбекистон терма жамоасининг 5 нафар боксчиси рингга кўтарилди. Жумладан, Феруза Казакова -51 кг. вазнда панамалик Юлиетт Хинестрозани 5:0 ҳисобида мағлуб этди. +80 кг. вазн тоифасида эса Олтиной Сотимбоева украиналик Мария Ловчинскага ҳеч қандай имконият қолдирмади. Вазни 60 килограммгача бўлган Ситора Турдибекова 4:1 ҳисобида украиналик Тетиана Довхал устидан зафар қучди.  

Эркаклар ўртасидаги беллашувларда эса Шавкатжон Болтаев -70 кг. вазндаги боксчилар ўртасида Швеция шарафини ҳимоя қилаётган Кевин Скоттни 3:2 ҳисобида енгди. Амалдаги Олимпия ўйинлари чемпиони Абдумалик Халоков эса -60 кг. вазндаги жангларда туркиялик Меҳметхан Чинарни катта устунлик билан таслим этди.  

Бугунги баҳслардан ҳам 5 нафар боксчимизнинг учрашувлари ўрин олган. Жуфтликлар билан танишинг:

-55 кг: Миразизбек Мирзаҳалилов - Паван Бартвал (Ҳиндистон)  

-80 кг: Жавоҳир Умматалиев - Никодем Козак (Польша)  

-57 кг: Хуморабону Мамажонова - Бояна Гойкович (Черногория)  

-70 кг Азиза Зокирова - Регина Лакос (Венгрия)  

-65 кг: Асадхўжа Мўйдинхўжаев -Жианхао Жу (Хитой)  

Жавоҳир Тошхўжаев, ЎзА