Нидерландиянинг Эйндховен шаҳрида бокс бўйича "Eindhoven Cup" халқаро турнирида Ўзбекистон терма жамоаси 2 та олтин ва битта кумуш медалга эга чиқди.

Жумладан, мусобақада Абдумалик Халаков -60 кг. вазнда ўтган финал жангида англиялик Жек Дриденни 5:0 ҳисобида мағлуб этган ҳолда олтин медални қўлга киритган бўлса, -90 кг. вазнда бўлиб ўтган сўнгги ҳал қилувчи жангда Тўрабек Ҳабибуллаев венгриялик Кисс Миланни 5:0 ҳисобида енгди ва терма жамоамизга иккинчи олтин медални келтирди. Вазни -70 кг. бўлган Асадхўжа Мўйдинхўжаев эса финалга қадар ўтган баҳсларда муваффақиятли иштирок этиб, кумуш медалга сазовор бўлди.

Шунингдек, Ўзбекистон терма жамоаси аъзоларидан Абдумалик Халаков "Eindhoven Cup" турнирининг “Энг яхши боксчиси” деб топилган бўлса, Тўрабек Ҳабибуллаев мусобақанинг “Энг иқтидорли боксчиси” дея эътироф этилди.

Жавоҳир Тошхўжаев,

ЎзА