15-19-avgust kunlari davom etgan tanlovda 2001-2010-yillardagi eng yaxshi besh nafar sportchimiz ovozga qoʻyildi. Jarayonda 3646 nafar hamyurtimiz ishtirok etdi. Tanlovda surxordaryolik polvonimiz Abdulla Tangriyev 1636 ta ovoz (45%) toʻplab, birinchi oʻrinni egalladi. Erkin kurash boʻyicha Olimpiada chempioni Artur Taymazov esa 1456 ovoz (40%) bilan ikkinchi oʻrinni egalladi:

1. Abdulla Tangriyev – 1636 ovoz (45%)

2. Artur Taymazov – 1456 ovoz (40%)

3. Vadim Menkov – 211 ovoz (6%)

4. Server Jeparov – 195 ovoz (5%)

5. Yekaterina Xilko – 148 ovoz (4%).

Ertaga 2011-2020-yillar uchun eng yaxshi sportchi nomi uchun nomzodlar eʼlon qilinadi. Oʻz navbatida, Milliy olimpiya qoʻmitasi mazkur tanlovda ishtirok etganlarga tashakkur aytib, barchani kelgusi dasturlarda ham faol ishtirok etishga chorlab qoladi.

Maʼlumot uchun, Abdulla Tovashevich Tangriyev 1981-yil 28-mart kuni Surxondaryo viloyatida tugʻilgan. Dzyudo boʻyicha Pekin – 2008 yozgi Olimpiya oʻyinlari kumush medali sohibi. 2011-yil mutlaq vazn toifasida jahon chempioni, uch karra jahon chempionati sovrindori. besh karra Osiyo chempioni va yana kumush va bronza medallari egasi. Shuningdek, uch karra Osiyo oʻyinlari sovrindori.

Polvonimiz parallel ravishda oʻzbek milliy kurashi bilan ham shugʻullanib borgan va bir necha bor jahon chempionligini qoʻlga kiritgan. Abdulla Tangriyevning gʻalabalari yuksak baholanib, u davlatimiz tomonidan “Shuhrat” medali, “Oʻzbekistonda Respublikasida xizmat koʻrsatgan sportchi” va “Oʻzbekiston iftixori” faxriy unvonlari bilan taqdirlangan.

Eslatib oʻtamiz, dastlabki 10 yillik uchun oʻtkazilgan soʻrovnomada mashhur futbolchimiz Mirjalol Qosimov nomzodi gʻalaba qozongan edi.