Ayni paytda qo‘shni Qozog‘iston Respublikasida qozoq yozma adabiyoti asoschisi, ma’rifatparvar shoir Abay Qo‘nonboyev tavalludi munosabati bilan turli ijodiy uchrashuvlar o‘tkazilmoqda. Ana shunday tadbirlardan biri Namangan viloyati Davlatobod tumanidagi “Yangi O‘zbekiston – yoshlar ziyo maskani” axborot-kutubxonasida ham o‘tkazildi.

O‘zbekiston Yozuvchilar uyushmasi Namangan viloyati bo‘limi bilan hamkorlikda “ZOOM” platformasi orqali o‘zbek-qozoq ijodkorlarining onlayn uchrashuvida taniqli adib Isoqjon Nishonovning Abay hayoti va ijodiga bag‘ishlangan “Millat vijdoni” kitobining taqdimoti ham bo‘lib o‘tdi.  

Yoshlar ziyo maskani va Pushkin nomidagi Sharqiy Qozog‘iston viloyat kutubxonasi o‘rtasidagi onlayn tadbirda namanganlik ijodkorlar, adabiyot ixlosmandlari, kutubxona vakillari, qozog‘istonlik noshir va ijodkorlar ishtirok etdi.  

– Qardosh qozoq xalqining buyuk ijodkori haqidagi kitob taqdimoti o‘tkazilayotgani kutubxonamizning qo‘shni davlat bilan kelgusidagi hamkorlik aloqalari uchun tamal toshi bo‘ldi, – deydi “Yangi O‘zbekiston – yoshlar ziyo maskani” axborot-kutubxonasi rahbari Dilnoza Azizova. – Biz hali do‘stlik aloqalarini yanada mustahkamlashga qaratilgan bu kabi tadbirlarni muntazam o‘tkazishni rivojlantirib boramiz.  

Tadbirda Sharqiy Qozog‘iston viloyat kutubxonasi hamda “Yangi O‘zbekiston – yoshlar ziyo maskani” axborot-kutubxonasi o‘rtasida birgalikda turli ijodiy uchrashuvlar, taqdimotlar o‘tkazishga kelishib olindi.  

Oqilxon Dadaboyev, O‘zA