АҚШда ҳибсда ушлаб турилган эронлик олим ватанига қайтарилди
АҚШда ҳибсга олинган эронлик олим Сирус Асғарий Вашингтон билан Теҳрон ўртасида имзоланган маҳбуслар алмашуви бўйича келишувга биноан Эронга учиб кетди.
АҚШда ҳибсга олинган эронлик олим Сирус Асғарий Вашингтон билан Теҳрон ўртасида имзоланган маҳбуслар алмашуви бўйича келишувга биноан Эронга учиб кетди, деб маълум қилди Эрон ташқи ишлар вазири Муҳаммад Жавод Зариф.
«Яхши хабар. Доктор Сирус Асғарий ўтирган самолёт АҚШдан жўнаб кетди», - деб ёзди вазир ўзининг Instagram саҳифасида. У ушбу воқеа билан олимнинг оиласини табриклади.
Асғарий 2017 йилда АҚШда Американинг Эронга қўллаган санкциясини бузганликда айбланиб қамоққа олинган эди. АҚШ суди Асғарийни оқлаганига қарамай, у визасининг муддати ўтиб кетганлиги баҳонасида ҳалигача миграция турмасида сақланаётган эди.
Энди Эрон томони америкалик Майкл Уайтни озод этиши кутилмоқда. Майкл Уайт Эрон турмасида коронавирусга чалинганди, шу боис уни ҳозир Теҳрондаги Швейцария элчихонасига даволаниш учун ўтказишган.